Ռուսաստանում հեռահաղորդակցության օպերատորները սարքավորումների բացակայության պատճառով խափանումների մտավախություն ունեն

Ռուսաստանում կապի օպերատորները ցանցի աշխատանքի խափանումների մտավախություններ ունեն՝ սարքավորումների պակասի պատճառով, որոնք առաջացել են արևմտյան պատժամիջոցների ու ռուբլու փոխարժեքի անկման հետ կապված։ Ներկա իրավիճակում հեռահաղորդակցության սարքավորումների պահուստը կբավականացնի միայն կես տարի։ Այս մասին «Կոմերսանտ» թերթին հայտնել է Ռուսաստանի Արդյունաբերողների և ձեռնարկատերերի միության ՏՏ հանձնաժողովը, որը ներառում է Ռուսաստանի Դաշնության խոշորագույն հեռահաղորդակցության օպերատորները:

Փաստաթղթում, որի հետ ծանոթացել է պարբերականը, ասվում է, որ ՌԴ-ից արևմտյան մատակարարների հեռանալու և ռուբլու փոխարժեքի անկման պատճառով ՏՏ սարքավորումների արժեքն արդեն աճել է 40%-ով և դեռ կարող է ավելանալ ևս 80%-ով։ Օպերատորները կարծում են, որ ենթակառուցվածքի աշխատունակությունը պահպանելու համար անհրաժեշտ է դադարեցնել զարգացման ծրագրերն ու կիրառել արդեն իսկ գնված սարքավորումները՝ կապի կայունությունն ապահովելու համար։ Սրա հետ մեկտեղ, կանխատեսվում է, որ վթարների ու կապի կայունության խախտումներ կարող են գրանցվել արդեն հուլիս-օգոստոս ամիսներին։

Օպերատորները Ռուսաստանի կառավարությանն առաջարկել են լրացուցիչ աջակցություն ցուցաբերել ոլորտին՝ մինչև տարեվերջ մորատորիում սահմանել կապի ունիվերսալ ծառայությունների ֆոնդում կատարվող ներդրումների վրա, նվազեցնել ռադիոհաճախականության սպեկտորի հարկերի վճարները: Մինչդեռ ՌԴ Թվային զարգացման նախարարությունից հայտնել են, որ ցանցերում խափանումների նախադրյալներ չեն տեսնում՝ նշելով, որ ոլորտն արդեն ստանում է «աջակցության միջոցառումների ամբողջական փաթեթներ»։

Տաթև Ֆռանգյան