Սխալմունք է եղել, հարցը համարում ենք փակված․ Ուկրաինայում ՀՀ դեսպան

«Ուկրաինայի Գերագույն Ռադայի թվիթերյան պաշտոնական էջում սխալմամբ արված գրառումը մեր միջամտությունից հետո շատ արագ  հեռացվել է»,- Factor.am-ի հետ զրույցում ասաց Ուկրաինայում Հայաստանի դեսպան Վլադիմիր Կարապետյանը։

Հիշեցնենք, որ Ուկրաինայի Գերագույն Ռադան Լեռնային Ղարաբաղում Ադրբեջանի ԶՈւ սադրանքին աջակցող գրառում էր արել Twitter-ի պաշտոնական էջում։  «Ադրբեջանի զինված ուժերը հարձակման են անցել Ղարաբաղում՝ օգտվելով ռուս զինվորականներին Ուկրաինա ուղարկելուց»,- ասվում էր գրառման մեջ։

«Այստեղ աշխատանքային ժամերը սկսվելուց անմիջապես հետո մեր միջամտության արդյունքում 15 րոպեի ընթացքում այն ջնջվել է»,- ասաց Ուկրաինայում ՀՀ դեսպանը։

Նա նշեց, որ հարցը քննարկել են Ուկրաինայի բոլոր պատկան մարմինների հետ և այն համարում են փակված։

Factor.am-ի դիտարկմանը, թե կարող եք վերահաստատել, որ գրառումը Ուկրաինայի պաշտոնական դիրքորոշումը չէ, Վլադիմիր Կարապետյանն արձագանքեց․ «Ճիշտ չի լինի, որ Հայաստանի դեսպանը խոսի Ուկրաինայի դիրքորոշման մասին, բայց կարող եմ հաստատ ասել, որ դա սխալմունք է և Ուկրաինայի արտաքին գործերի նախարարության կարծիքը չէ»։

Նշենք նաև, որ Ուկրաինայի Ռադայի թվիթերյան էջում եղած գրառման վերաբերյալ  Factor.am-ը մեկնաբանություն է վերցրել նաև Հայաստանում Ուկրաինայի հարցերի ժամանակավոր հավատարմատար Դենիս Ավտոնոմովից։ Նա հայտարարել է, որ արդեն հեռացված գրառումը չի արտահայտում Ուկրաինայի Գերագույն Ռադայի և Ուկրաինայի պաշտոնական դիրքորոշումը։

Հռիփսիմե Հովհաննիսյան