21.12.2025 | 21:24
«Ապահովել հավասար մրցակցային պայմաններ». վարչապետը՝ ԵԱՏՄ ներքին շուկայի խոչընդոտների մասին
Այդ հարցը Գերագույն Ռադայում քվեարկության չի դրվել, այն Ուկրաինայի պաշտոնական դիրքորոշումը չէ․ Դենիս Ավտոնոմովը՝ Ադրբեջանի սադրանքին աջակցող գրառման մասին
Քաղաքականություն
25.03.2022 | 12:40
Դա Ուկրաինայի Գերագույն Ռադայի և Ուկրաինայի պաշտոնական դիրքորոշումը չէ․ այս մասին Factor.am-ի հետ զրույցում ասաց Հայաստանում Ուկրաինայի հարցերով ժամանակավոր հավատարմատար Դենիս Ավտոնոմովը՝ անդրադառնալով Լեռնային Ղարաբաղի մասին Ուկրաինայի Ռադայի թվիթերյան գրառմանը։ Նա մատնանշեց՝ գրառումն արդեն հեռացված է։
Հիշեցնենք, որ Ուկրաինայի Գերագույն Ռադան Լեռնային Ղարաբաղում Ադրբեջանի ԶՈւ սադրանքին աջակցող գրառում էր արել Twitter-ի պաշտոնական էջում։ «Ադրբեջանի զինված ուժերը հարձակման են անցել Ղարաբաղում՝ օգտվելով ռուս զինվորականներին Ուկրաինա ուղարկելուց»,- ասվում էր գրառման մեջ։
«Գերագույն Ռադայում այդ հարցը քվեակության չի դրվել, դրա համար չարժե այն գնահատել որպես Ուկրաինայի խորհրդարանի դիրքորոշում»,- հայտարարեց ուկրաինացի դիվանագետը։
Ավտոնոմովի խոսքով՝ Ուկրաինայի պաշոնական դիրքորոշումը Մոլդովայի, Վրաստանի, Ադրբեջանի և այլ երկրների տարածքային ամբողջականության վերաբերյալ մնացել է անփոոխ անկախության տարիներից ի վեր։
Դիտարկմանը, թե արդյոք գրառման նախաձեռնությունը եղել է խորհրդարանի առանձին անդամների կողմից, նա արձագանքեց՝ տեղյակ չէ, թե նման հրապարակումների համար ով է որոշում կայացնում։ «Կրկնեմ, որ այս հարցը չի քննարկվել Գերագույն Ռադայում, դրա մասին որոշում չի կայացվել պաշտոնական մակարդակում»,- ընդգծեց նա։
Նշենք, որ Ուկրաինայի Ռադայի թվիրթերյան էջի գրառումը տարածել էր նաև աշխարհահռչակ ռոք երաժիշտ Սերժ Թանկյանը՝ գրելով․ «Հենց սա է պատճառը, որ հայերն աջակցում են Ուկրաինայի քաղաքացիներին, բայց ոչ նրանց կառավարությանը։ Նրանք շնորհավորում են Ադրբեջանի նավթաօլիգարխիկ բռնապետությանը հայերին իրենց պապենական հողերից բռնությամբ քշելու համար։ Ամոթ նրանց»։
Հռիփսիմե Հովհաննիսյան
