12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Ուկրաինայի Գլխավոր շտաբը՝ հակահարձակման անցնելու մասին․ պատերազմի 21-րդ օրը. ՏԵՍԱՆՅՈՒԹ
Քաղաքականություն
16.03.2022 | 15:47
Ռուս-ուկրաինական պատերազմի չորրորդ շաբաթը սկսվել է ուկրաինական կողմից հակահարձակման փորձերով։ Ուկրաինայի Զինված ուժերի գլխավոր շտաբի հայտարարությունում նշվում է, որ իրենց հաջողվել է Ուկրաինայի ժամանակավոր օկուպացված տարածքներում ավերիչ հարվածներ հասցնել ռուսական զորքերի խմբերին, իսկ որոշ շրջաններում՝ հակահարձակման անցնել։
«Հակառակորդի ռազմաօդային ուժերը շարունակում են հրթիռակոծություններն ու ռմբակոծությունները ուկրաինական քաղաքների ենթակառուցվածքների և խիտ բնակեցված տարածքների ուղղությամբ, թեև առանձին հատվածներում նահանջելիս շարունակում են կորուստներ կրել։ Նրանց հիմնական ջանքերն ուղղված են նախկինում օկուպացված սահմանների ու պաշտպանական տարածքների համախմբմանն ու պահպանմանը»,- ասվում է հաղորդագրությունում։
Ուկրաինայի Արտակարգ իրավիճակների պետական ծառայությունը հայտնում է, որ առավոտյան Կիևում ռուսական զորքերի կողմից գնդակոծվել է մայրաքաղաքի բնակելի թաղամասերից մեկը։
Շարունակում է գերլարված մնալ իրավիճակը Մարիուպոլում․ այստեղ չեն դադարում ռազմական գործողությունները։ Քաղաքապետի խորհրդական Պետրո Անդրյուշչենկոն հայտնել է, որ Մարիուպոլում շուրջ 350․000 մարդ շարունակում է մնալ արգելափակված, անվտանգ միջանցքներ ստեղծելու և քաղաքից խաղաղ բնակիչներին տարհանելու բազմաթիվ փորձերը վերջին օրերին ձախողվել են։ Մարդկանց մեծ մասն անմարդկային պայմաններում է ապրում՝ նկուղներում, կացարաններում, առանց սննդի, ջրի, էլեկտրականության և ջեռուցման։
Ռազմական գործողությունների ընթացքում զոհվել է 3, վիրավորվել՝ առնվազն 35 լրագրող։ Այս մասին ահազանգում է Ուկրաինայի Գերագույն ռադայի մարդու իրավունքների հանձնակատար Լյուդմիլա Դենիսովան։ Միաժամանակ, ՄԱԿ-ի Մարդու իրավունքների գրասենյակն Ուկրաինայում խաղաղ բնակչության շրջանում կորուստների տվյալներ է ներկայացրել։ Դրանց համաձայն՝ պատերազմի սկզբից ի վեր Ուկրաինայում զոհվել է 690 խաղաղ բնակիչ, այդ թվում՝ 100 երեխա, վիրավորվել է 1143 մարդ։
Չդադարող ռազմական գործողություններին զուգահեռ՝ շարունակվում են ռուս-ուկրաինական բանակցությունները։ Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը նշել է, որ տեսակապի ձևաչափով անցկացվող բանակցությունների չորրորդ փուլի ընթացքում քննարկված հարցերի թվում են խաղաղությունը, հրադադարը, զորքերի անհապաղ դուրսբերումը և անվտանգության երաշխիքները։
Մինչ այդ, Եվրոպայի Խորհրդի գլխավոր քարտուղար Մարիա Պեյչինովիչ-Բուրիչը հայտնել է, որ նամակ է ստացել Ռուսաստանի Դաշնության արտաքին գործերի նախարար Սերգեյ Լավրովից, որում տեղեկացվում է կազմակերպությունից դուրս գալու՝ Մոսկվայի որոշման մասին։ Նրա խոսքով՝ Ռուսաստանն իր կամքով է դուրս գալիս Եվրոպայի խորհրդից, դա կշռադատված և մտածված որոշում է։
Մանրամասները՝ տեսանյութում։
Ռոզա Վարդանյան
