«Մեր ազգում տենց ծեծողներ էս պահին չկան». Ալիկ Սարգսյանը եղբոր՝ լրագրող ծեծելու և Արտաշատի հեռուստաընկերությունը գնելու մասին

ՀՀ նախկին ոստիկանապետ, ԱԺ ՀՀԿ խմբակցության պատգամավոր Ալիկ Սարգսյանն այսօր factor.am-ի հետ զրույցում հավաստիացրեց, որ չնայած իր եղբայրը գնել է Արտաշատի «Տելելեքս» հեռուստաընկերությունը, այն չի օգտագործվելու Արտաշատի ընտրությունների նախընտրական շրջանում՝ Հովիկ Աբրահամյանի թեկնածուի դեմ:

Նշենք, որ նոյեմբերին կայանալու են Արտաշատի քաղաքապետի ընտրությունները, քանի որ քաղաքապետի պաշտոնը թափուր է մնացել նախկին վարչապետ Հովիկ Աբրահամյանի որդու՝ Արգամ Աբրահամյանի հրաժարականից հետո:

Ներկայումս քաղաքապետի ժամանակավոր պաշտոնակատար է նշանակված փոխքաղաքապետ Գագիկ Պողոսյանը, ով Աբրահամյանի զարմիկն է: Ալիկ Սարգսյանը պնդում է, թե դա իր մորաքրոջ տղայի հեռուստաընկերությունն է եղել, որը մեկնել է հանրապետությունից, և ինքը նպատակ չունի հեռուստաընկերությունն օգտագործել նախընտրական նպատակներով, քանի որ այդ հեռուստաընկերությունը շատ ազդեցություն չի ունեցել ու չի էլ ունենա:

«Նպատակը չի եղել, որ նախընտրական պրոցեսներում օգտագործվի: Եղբայրս մասնագիտական հետաքրքրություններ ունի, ստուդիա, հանդիսություններ և այն»,- ասաց նա:

Երբ հիշեցրինք, որ մամուլում գրվել է, որ հեռուստաընկերությունը գնած Ալիկ Սարգսյանի եղբայր՝ Անդրանիկ Սարգսյանը 2013-ին ծեծի է ենթարկել Maxinfo.am կայքի հիմնադիր, լրագրող Բաբկեն Հարությունյանին ու վերջինս այդ ժամանակ հայտարարություն էր տարածել, որում ասվում էր, թե Անդրանիկ Սարգսյանն իրեն ծեծի է ենթարկել այն բանի համար, որ Արտաշատում փորձել է նկարահանումներ կատարել, նախկին ոստիկանապետը նման պատասխան տվեց. «Դա հերյուրանք է, լրագրողին նորից հարցրեք: Խոսքը վերաբերում է մյուս եղբորս, որը ընդհանրապես դրա հետ կապ չունի: Եղբայրս ընդամենը բաժանել է, թույլ չի տվել, որ էդ լրագրողն ընկնի պատմության մեջ: Իսկ որ եղբայրս լրագրող ծեծի, մեր ազգում տենց ծեծողներ էս պահին չկան: Ես դա կանխել եմ շատ վաղուց»:

Մանրամասները դիտեք factor.am-ի հետ ՀՀԿ պատգամավոր Ալիկ Սարգսյանի հարցազրույցում:

Մարինե Խառատյան