16.09.2026 | 18:34
Հայաստանի Մ-17 հավաքականը պարտվել է Լիբանանին
Facebook-ը Ռուսաստանում արգելափակվեց
Քաղաքականություն
04.03.2022 | 22:44
2022 թվականի մարտի 4-ին որոշում է կայացվել Ռուսաստանի Դաշնությունում արգելափակել մուտքը Facebook ցանց։ Այս մասին հայտարարությամբ է հանդես եկել «Ռոսկոմնադզոր»-ը։
«2020 թվականի հոկտեմբերից ի վեր Facebook-ի կողմից ռուսական լրատվամիջոցների և տեղեկատվական ռեսուրսների նկատմամբ խտրականության 26 դեպք է գրանցվել։ Վերջին օրերին սոցիալական ցանցը սահմանափակել է մուտքը դեպի «Զվեզդա» հեռուստաալիք, «ՌԻԱ Նովոստի» լրատվական գործակալություն, «Սպուտնիկ», «Russia Today», «Լենտա.ռու» և «Գազետա.ռու» կայքեր:
Facebook-ի գործողությունները հակասում են օտարերկրյա ինտերնետային հարթակներում տեղեկատվության ազատ հոսքի և ռուս օգտատերերի՝ ռուսական լրատվամիջոցներ անարգել մուտք գործելու հիմնական սկզբունքներին»,-նշվում է հաղորդագրության մեջ։
Factor.TV-ն արդեն հայտնել էր, որ Պուտինի ռեժիմն աննախադեպ ճնշումներ է կիրառում՝ սահմանափակելու ազատ խոսքը երկրում և խոչընդոտելու լրատվամիջոցների աշխատանքը: Ուկրաինայի դեմ սանձազերծած պատերազմը Կրեմլի ազդեցության գոտուց դուրս լուսաբանելու համար, Ռուսաստանի գլխավոր դատախազության որոշմամբ, հակաիշխանական դիրքորոշում ունեցող լրատվամիջոցների գործունեությունը երկրում դադարեցվել է:
Եթերազրկվել և լուծարվել է ռուսական «Էխո Մոսկվի» ռադիոկայանը, սահմանափակվել է «Մեդուզա» կայքի հասանելիությունը, դարարեցվել է «Դոժդ» հեռուստաալիքի օնլայն հեռարձակումը, սահմանափակվել է նաև օտարերկրյա լրատվամիջոցներից «Ազատություն» ռադիոկայանի, BBC-ի, «Դոյչե Վելլե»-ի ռուսական ծառայությունների կայքերի հասանելիությունը։
