20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Դուրս եկե՛ք, դա մեր տարածքն է․ ադրբեջանցիները պահանջում են լքել Խրամորթը
Քաղաքականություն
26.02.2022 | 13:59
Արդեն երեք օր է՝ ադրբեջանցիները Արցախի Ասկերանի շրջանի Խրամորթ գյուղի բնակիչներից պահանջում են լքել գյուղը․ Factor.TV-ի հետ զրույցում ասաց Արցախի Ներքին գործերի նախարարության հասարակայնության հետ կապի և լրատվության ծառայության պետ Հունան Թադևոսյանը։
«Ադրբեջանական կողմը Ասկերանի շրջանի Խրամորթ գյուղի հարակից տարածքում՝ Աղդամի շրջանում, բարձրախոսներով փորձում է խուճապ առաջացնել գյուղում և ասում է, որ պետք է լքեք գյուղը, եթե մտածում եք ձեր և ձեր հարազատների առողջության մասին։ Ասում են՝ վտանգավոր է այստեղ, դո’ւրս եկեք մեր տարածքներից, որովհետև դա Ադրբեջան է»,- մանրամասնեց Թադևոսյանը։
Նա տեղեկացրեց, որ ոստիկանության ծառայողները այս պահին էլ գտնվում են Խրամորթում։
«Բնակիչների շրջանում խուճապ չկա, ոչ ոք չի լքել գյուղը, որովհետև խրամորթցիները գիտակցում են, որ փորձ է արվում խուճապ առաջացնել, որպեսզի իրենք լքեն գյուղը»,- ընդգծեց ՆԳ նախարարության հասարակայնության հետ կապի և լրատվության ծառայության պետը։
Թադևոսյանի փոխանցմամբ՝ ռուս խաղաղապահներն այս պահին բանակցում են ադրբեջանական կողմի հետ, որպեսզի նրանք դադարեցնեն սադրանքները։
Հիշեցնենք, որ փետրվարի 15-ին Խրամորթ համայնքի հարևանությամբ ամրակայված ադրբեջանական դիրքից հրազենով կրակ էին բացել նույն համայնքի վարչական տարածքում տեղակայված վարելահողում տրակտորով աշխատանքներ կատարող անձանց ուղղությամբ: Կրակոցների հետևանքով վնասվել էր տրակտորի հետևի անվադողը։ Խրամորթ համայնքի ղեկավար Զորիկ Աբրահամյանը մեզ հայտնել էր, որ ադրբեջանցիները ոչ միայն կրակում են, այլև ուղղակիորեն սպառնում են և արգելում դաշտում աշխատել։
Արփի Հակոբյան
