Թուրքիայում հայտնի հեռուստալրագրողին կալանավորել են Էրդողանին վիրավորելու համար

Թուրքական դատարանը հայտնի հեռուստալրագրող Սեդաֆ Քաբաշին բանտարկելու որոշում է կայացրել՝ երկրի նախագահ Ռեջեփ Թայիփ Էրդողանին վիրավորելու համար, գրում են թուրքական լրատվամիջոցները։

Ոստիկանությունը առավոտյան ժամը 2-ի սահմաններում ձերբակալել է նրան ու տարել Ստամբուլի ոստիկանության գլխավոր բաժանմունք՝ նախքան նրան քաղաքի գլխավոր դատարան տեղափոխելը, որտեղ էլ դատարանը պաշտոնապես որոշել է նրան կալանավորել։

Ենթադրյալ վիրավորանքը, որ Քաբաշն արտահայտել է և՛ հեռուստատեսությամբ, և՛ թվիթերյան իր էջում, արժանացել է կառավարության անդամների դատապարտմանը։

Նա, մասավորապես, ասել է․ «Եզը կարող է իր ճանապարհը գտնել դեպի պալատ, սակայն դա նրան թագավոր չի դարձնում։ Սա, սակայն, պալատն է վերածում գոմի»։

Tele1 հեռուստաալիքի գլխավոր խմբագիր Մերդան Յանարդաղը, որի եթերում  Քաբաշն արել է այդ արտահայտությունը, քննադատել է լրագրողի կալանավորումը։

«Նրա ձերբակալումը գիշերը ժամը 2-ին մի ասացվածքի պատճառով անընդունելի է։ Սա փորձ է՝ վախեցնել լրագրողներին, մեդիային ու հասարակությանը»,- գրել է նա թվիթերյան իր էջում։

Ռեջեփ Թայիփ Էրդողանի մամուլի խոսնակ Ֆահրեթթին Ալթունն էլ գրել է հետևյալը․ «Այսպես կոչված լրագրողը վիրավորում է մեր նախագահին հեռուստաալիքով, որը այլ նպատակ չունի, քան ատելություն տարածելը։ Ես դատապարտում եմ այս անբարոյականությունն ամենախիստ ձևով։ Սա ոչ միայն անբարոյական է, այլև անպատատասխանատու»։

Նշենք, որ հազարավոր մարդիկ մեղադրվել և դատապարտվել են Էրդողանին վիրավորելու հանցագործության համար՝ վարչապետից նախագահ դառնալու յոթ տարվա ընթացքում։ 2020 թվականին 31․297 հետաքննություն է իրականացվել, հարուցվել է 7․790 գործ, 3․325 մարդ դատապարտվել է։ 2014-ից ի վեր Էրդողանին վիրավորելու համար 160․169 հետաքննություն է իրականացվել։

Էմմա Չոբանյան