17.12.2025 | 12:34
Թուրքիան որոշում է կայացրել արտաքսել ադրբեջանցի ընդդիմադիր գործչին. Բաքվում նրան սպառնում է ձերբակալություն
Սառնամանիք Գյումրիում․ փողոցներով քայլելը դառնում է վտանգավոր. ԼՈւՍԱՆԿԱՐՆԵՐ
Հասարակություն
17.01.2022 | 20:27
Գյումրիում վերջին օրերին գրանցվող ցածր ջերմաստիճանների պայմաններում (անցած գիշերը եղել է -25-27 °C) վտանգավոր է դարձել մայթերով քայլելը։ Օրինակ՝ Գյումրու Անի թաղամասի Պարյուր Սևակի անվան գլխավոր փողոցը, որտեղ գտնվում է նաև Շիրակի մայր բուհը, կիսով չափ սառցակալած է, մերկասառույց է նաև մայթերին։
Նկատելի է, որ Գյումրու քաղաքապետարանի կոմունալ ծառայությունը պարբերաբար աղով ու ավազով մշակում է փողոցներն ու մայթերը, սակայն ծառայության ղեկավար Արման Շաբոյանի պարզաբանմամբ, եղանակը փոքր-ինչ պիտի տաքանա, որ իրենց կիրառած միջոցները քայքայեն սառույցը։
«Այս երեք օրվա ընթացքում մեծ քանակությամբ ավազ ու աղ ենք օգտագործել, այն ինչ պահեստավորել էինք տարվա կտրվածքով, կեսից ավելին օգտագործել ենք այս ընթացքում։ Իհարկե, նորից ձեռք բերելու որևէ խնդիր չունենք, արդեն կա պայմանավորվածություն։ Ոչ մի ահազանգ անպատասխան չենք թողնում։ Ես անձամբ եմ շրջում ու հսկում, աչքիս առաջ են ցփնում ավազն ու աղը, սակայն այնպիսի սառնամանիք է, որ մեկ ժամ անց տպավորություն ենք ստանում, թե կարծես աշխատանք արված չէ, ստիպված նորից ենք ցփնում »,-ասաց կոմունալ ծառայության ղեկավարը։
Գյումրի բժշկական կենտրոնի փոխտնօրեն Արմեն Խաչատրյանից էլ հետաքրքրվեցինք, թե կա՞ն արդյոք տուժածներ, որոնք կոտրվածք են ստացել մերկասառույցի պատճառով։ Ըստ նրա, բարեբախտաբար, դեռ նման դեպք չի արձանագրվել։
Արմիկ Մովսիսյան
