17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Ուկրաինայի ԱԳՆ-ն դիմել է Վրաստանի իշխանություններին՝ պահանջելով հարգանքով վերաբերվել Ուկրաինայի քաղաքացի Սաակաշվիլիին
Քաղաքականություն
29.12.2021 | 18:26
Ուկրաինայի ԱԳ նախարարությունը հայտարարություն է տարածել Միխեիլ Սաակաշվիլիի վերաբերյալ՝ Վրաստանի իշխանություններին կոչ անելով հարգանքով վերաբերվել Ուկրաինայի քաղաքացու նկատմամբ: Այս մասին հայտնում է «Նովոստի Գրուզիան»։
«Միխեիլ Սաակաշվիլիին զինվորական հոսպիտալից բանտ տեղափոխելու երեկվա փորձերը սխալ էին։ Վրաստանի քրեակատարողական ծառայության համապատասխան որոշման մասին փաստաբանները տեղեկացված չեն եղել։ Միխեիլ Սաակաշվիլիի առողջական վիճակը թույլ չի տալիս դա անել։ Նա հետագա վերականգնման կարիք ունի։ Կոչ ենք անում Վրաստանի իշխանություններին՝ հարգանքով վերաբերվել Ուկրաինայի քաղաքացուն և թույլ չտալ գործողություններ, որոնք սպառնում են նրա կյանքին և առողջությանը։
Վրաստանում ուկրաինացի դիվանագետները շարունակում են իրավիճակն առանձնահատուկ վերահսկողության տակ պահել, ինչպես նաև մշտական երկխոսություն են վարում վրացական իշխանությունների և Միխեիլ Սաակաշվիլիի փաստաբանների հետ։ Վրաստանում Ուկրաինայի հյուպատոսին վաղը թույլ կտան այցելել Միխեիլ Սաակաշվիլիին։
Վրացական կողմը պետք է միանշանակ թույլ տա ուկրաինացի բժիշկներին այցելել Սաակաշվիլիին՝ զննելու համար։ Մենք շարունակում ենք աշխատել բուժման և վերականգնման համար մարդասիրական նկատառումներով նրա Ուկրաինա վերադառնալու ուղղությամբ։ Նման քայլի անհրաժեշտությունն ակնհայտ է»,- ասված է Ուկրաինայի ԱԳՆ հայտարարության մեջ։
Տաթև Ֆռանգյան
