17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Միխեիլ Սաակաշվիլիի տեղափոխումը հիվանդանոցից բանտ հետաձգվել է
Քաղաքականություն
28.12.2021 | 15:36
Վրաստանի Արդարադատության նախարարության հատուկ քրեակատարողական ծառայությունը որոշել է նախկին նախագահ Միխեիլ Սաակաշվիլիին որոշ ժամանակով թողնել Գորիի զինվորական հոսպիտալում։ Այս մասին ասվում է ծառայության հաղորդագրության մեջ, գրում է «Սպուտնիկի» վրացական ծառայությունը։
Նախօրեին այն բանից հետո, երբ Սաակաշվիլին տեղեկացվել էր բանտ ծրագրված տեղափոխման մասին, նրա առողջական վիճակը վատացել էր։ Նախկին նախագահի փաստաբան Նիկա Գվարամիան Գորիի հիվանդանոցում տեղի ունեցած վերջին իրադարձություններն անվանել է «Սաակաշվիլիին առևանգելու հերթական փորձ»։ Նրա խոսքով՝ զինվորական հոսպիտալն այժմ ոչնչով չի տարբերվում Գլդանիի բանտի հոսպիտալից:
«Հասարակության մեծ հետաքրքրությունից ելնելով՝ տեղեկացնում ենք, որ այս տարվա դեկտեմբերի 27-ին, դատապարտյալ Միխեիլ Սաակաշվիլիի բուժման ավարտից հետո, բուժանձնակազմը որոշել է նրան դուրս գրել Գորիի զինվորական հոսպիտալից»,- ասվում է հաղորդագրությունում։
Այդ նույն հաղորդագրության մեջ էլ նշվում է, որ երբ Սաակաշվիլիին հայտնել են դուրսգրման մասին, նրա վիճակը կտրուկ վատացել է, մասնավորապես՝ տատանվել է ճնշումը։ Դրանից հետո հատուկ ուղղիչ հաստատությունը որոշում է կայացրել ժամանակավորապես հետաձգել Սաակաշվիլիին Ռուսթավիի №12 բանտ տեղափոխելու որոշումը, որտեղ նա գտնվել է հոկտեմբերի 1-ից։
Տաթև Ֆռանգյան
