17.11.2024 | 19:53
Հայաստանի հավաքականը 1:2 հաշվով հաղթեց Լատվիայի թիմին
Առուշ Առուշանյանն ազատ կարձակվի՞. դատարանը հեռացավ խորհրդակցական սենյակ
Հասարակություն
27.12.2021 | 20:28
Սյունիքի մարզի ընդհանուր իրավասության դատարանի Գորիսի նստավայրում՝ նախագահությամբ դատավոր Գնել Գասպարյանի, այսօր շարունակվեց Գորիսի համայնքապետ Առուշ Առուշանյանի և մյուսների քրեական գործով քննությունը։ Պաշտպանական կողմն այսօր կրկին առաջարկեց փոխել Առուշանյանի խափանման միջոց կալանքը՝ այն 30 մլն ՀՀ դրամ գրավով փոխարինելու միջնորդություն ներկայացնելով։
Միջորդության հիմքում դրվել է այն հանգամանքը, որ Լուսինե Ավետյանի ցուցմունքից հետո գործի քննությանը խոչընդոտելու ռիսկն էապես նվազել է, հետևաբար, Առուշ Առուշանյանի նկատմամբ ընտրված խափանման միջոցը պետք է փոխվի։
Դատարանը հեռացավ խորհրդակցական սենյակ՝ որոշում կայացնելու։ Այն կհրապարակի վաղը ժամը 11։00-ին։
Հիշեցնենք՝ նախաքննական մարմնի հաղորդագրության համաձայն՝ «Հայաստան» դաշինքի ընտրական ցուցակի 32-րդ համարը զբաղեցնող Առուշ Առուշանյանն իր դաշինքի օգտին առավելագույն քվեներ ապահովելու և ընտրություններում ցանկալի արդյունք արձանագրելու համար նախապատրաստել է ծանր հանցագործություն, այն է` երկու և ավելի ընտրողի կաշառք տալը։ Ըստ մեղադրանքի՝ արտահերթ ընտրություններից մի քանի օր առաջ համայնքապետը հանդիպել է Քարահունջի վարչական ղեկավար Լուսինե Ավետյանին և առաջարկել ընտրություններից հետո դրամական օգնություն տրամադրել այն ընտրողներին, ովքեր կխոստանան ընտրել «Հայաստան» դաշինքին:
Ըստ ՀՔԾ-ի՝ հանցագործությունն ավարտին չի հասցվել Առուշանյանի կամքից անկախ հանգամանքներով, քանի որ Քարահունջի ղեկավար Ավետյանը հրաժարվել է ընտրողներին հանդիպելուց և նրանց դրամական օգնության տեսքով կաշառք տալուց:
Ռոզա Վարդանյան
