21.04.2026 | 23:25
Եթե յուրաքանչյուրին ձայնագրես, ամեն մեկը մի բան կասի. Կարապետյանը՝ «շուն ու շանգյալ» բնորոշման մասին. ՏԵՍԱՆՅՈՒԹ
Թուրքիան ակնկալում է, որ Իգդիր-Նախիջևան գազատարի շինարարությունը հնարավորինս շուտ կմեկնարկի
Քաղաքականություն
22.12.2021 | 17:20
Թուրքիան ակնկալում է, որ Իգդիր-Նախիջևան գազատարի շինարարությունը կսկսվի կարճ ժամանակում։ Այս մասին հայտարարել է Բաքվում գտնվող Թուրքիայի էներգետիկայի ու բնական պաշարների նախարար Ֆաթիհ Դյոնմեզը թուրք-ադրբեջանական համաժողովի ընթացքում, գրում են ադրբեջանական լրատվամիջոցները։
«Ադրբեջանն ու Թուրքիան անցյալ տարի դեկտեմբերին հուշագիր ստորագրեցին Իգդիր-Նախիջևան գազատարի կառուցման մասին։ Հուսով ենք, որ SOCAR-ն ու BOTAS-ը մոտ ժամանակներում կավարտեն այդ նախագծի իրագործման աշխատանքները։ Տեխնիկական ուսումնասիրության ավարտից հետո մենք ակնկալում ենք, որ գազատարի շինարարությունը կսկսվի հնարավորինս շուտ»,-ասել է Դյոնմեզը։
Ադրբեջանի էներգետիկայի նախարար Փարվիզ Շահբազովն իր հերթին հիշեցրել է, որ Իգդիր-Նախիջևան գազատարի հզորությունը 500 մլն խորանարդ մետր է կամ օրական 1․5 մլն խորանարդ մետր։
«Այս ծրագիրը կամրապնդի Նախիջևանի Ինքնավար Հանրապետության էներգետիկ անվտանգությունը և, ընդհանուր առմամբ, կխորացնի Թուրքիայի և Ադրբեջանի միջև կապերը»,- ասել է նա։
Թուրքիայի տարածքում այս գազատարի երկարությունը կազմելու է մոտ 85 կմ։ Ծրագրի շրջանակում նաև նախատեսվում է կառուցել գազի չափման կայան։
Նշենք, որ Նախիջևանը հիմա ստանում է իրանական գազ՝ 2004 թվականին Բաքվի ու Թեհրանի միջև կնքված փոխանակման համաձայնագրով, ըստ որի՝ Ադրբեջանը գազ է մատակարարում Իրանում մեկուսացած Աստարա քաղաքին, որը երկրի ներսում գազամատակարարում չունի։ Դրա դիմաց Իրանը գազ է մատակարարում Նախիջևանին ամբողջ ծավալի 85 տոկոսի չափով, իսկ 15 տոկոսը տարանցման վճարն է, որը Բաքուն փորձում է վերանայել։
Էմմա Չոբանյան
