Կստացվի՝ ՀՀ-ի թևերը ոլորած պարտադրում են հրաժարվել իրավունքներից․ չի՛ կարող հայ-թուրքական կարգավորում լինել՝ առանց հատուցումների․ Արա Պապյան․ ՏԵՍԱՆՅՈՒԹ

Factor TV–ի հարցազրույցը դիվանագետ, ԱԺԲ խորհրդի անդամ Արա Պապյանի հետ․

-Պարո՛ն Պապյան, Դուք կասկածներ եք հայտնում, որ ՀՀ-ի ներկայացուցիչը լավագույնս կներկայացնի պետության շահերը Թուրքիայի հետ բանակցություններում։ Վստահաբար, ԱԺԲ-ի կողմնակիցները կցանկանային, որ Ձեզ վերապահվեր այդ գործառույթը։ Եթե Ձեզ՝ որպես դիվանագետի, առաջարկվեր ՀՀ-ի բանակցողը լինել, կհամաձայնվեի՞ք։

-Եթե պետք է բանակցեի ամեն ինչ հանձնելու և տալու առումով, այն, ինչ այսօր է մեզ հայտնի, վստահաբար, ոչ։ Բայց եթե մենք բանակցում էինք Թուրքիայի հետ համաձայնության գալ՝ երեք մակարդակով հատուցումների վերաբերյալ՝ տարածքային, նյութական և բարոյական, կրկնում եմ՝ հատուցումներ իրենց կողմից ՀՀ-ին և հայ ժողովրդին։

-Այսինքն՝ Դուք Թուրքիայի առաջ հատուցումների պահանջ կդնեի՞ք։

-Միանշանակ։ Չի կարող լինել հայ-թուրքական կարգավորում՝ առանց տարածքային, նյութական և բարոյական հատուցումների։ Մնացածը՝ եթե դրանից պակաս ստանում է Հայաստանը, դա կարգավորում չի, պարզապես Հայաստանի թևերը ոլորելով պարտադրել է սեփական իրավունքներից հրաժարվելու։

-Ինչքանո՞վ է իրատեսական, որ Հայաստանից մի քանի անգամ ուժեղ պետությունը համաձայնվի փոխհատուցումների Ձեր պահանջներին, ասելով՝ «Հարգելի՛ հայեր, եկեք Վուդրո Վիլսոնի Հայաստանը ձեզ փոխանցեմ, միայն թե հարաբերություններ կարգավորենք»։

-Բայց ես չասեցի՝ ձեզ տալու մասին։ Օրինակի համար՝ մենք կարող ենք բանակցել և Վիլսոնյան Հայաստանի վրա ստանալ ազատ, անխափան, անվճար փոխադրումների իրավունք։ Կարող ենք ստանալ նյութական ժառանգությունը տնօրինելու իրավունք։

-Կարո՞ղ ենք ստանալ, թե՞ ցանկանում ենք ստանալ։

-Կարող ենք ստանալ։ Խնդիրը ո՞րն է․ հայ-թուրքական հարաբերությունները փորձ է արվում վարպետորեն և հաջողակ կերպով դնել Հայաստան-Թուրքիա հարաբերությունների վրա։ Ո՛չ, Հայաստան-Թուրքիա և հայ-թուրքական հարաբերությունները երբեք երկկողմ չեն եղել։ Հայկական հարցը միջազգային հարց է։ Եվ Հայաստանի տարածքների հարցն է միջազգային հարց։ Դա առաջին հարցն է, որ Ազգերի լիգան քննարկել է ընդհանրապես և խնդիրը բաց է։ Կա միջազգային դատարան, կա ՄԱԿ Անվտանգության խորհուրդ, պետք է գնալ այդ հարցերով։

Իհարկե, եթե մենք Թուրքիայի հետ մեն-մենակ ենք մնում, ինչպես իշխանությունն է ասում և դա հերոսություն է ներկայացվում, և ուղղակի բանակցում ենք, այո, ուժերի այնպիսի անհավասարություն կա, այդ թվում՝ դիվանագիտական կորպուսի, որ մենք պարտվելու ենք։

Հարցազրույցն ամբողջությամբ՝ տեսանյութում։

Ռոբերտ Անանյան