«Ռոսավիացին» ռուսական ավիաընկերությանը Մոսկվայից Արցախի գրավյալ Վարանդա չվերթների իրականացման թույլտվություն է տվել

Ռուսաստանի օդային տրանսպորտի դաշնային գործակալությունը՝ «Ռոսավիացիան», երեք ավիաընկերությունների թույլատրել է Ռուսաստանի տարբեր քաղաքներից Ադրբեջան 7 չվերթ իրականացնել։ Ադրբեջանական լրատվամիջոցները գրում են, որ «Ռոսավիացիան» անցյալ շաբաթ կայացած հանդիպմանը որոշում է կայացրելդեպի Ադրբեջան թռիչքներ թույլ տալ «Azur Air», «North Wind» և «IrAero» ընկերություններին։

«Ռոսավիացիա»-ի որոշմամբ՝ «IrAero»-ն թույլտվություն է ստացել թռիքչներ իրականացնել դեպի Արցախի գրավյալ Վարանդա (Մոսկվա-Ֆիզուլի) և Զաքաթալա (Մոսկվա-Զաքաթալա)՝ շաբաթական երկու անգամ։

Բացի այդ, «Azur Air»-ը թույլտվություն է ստացել Ռուսաստանի չորս՝ Սամարա, Դոնի Ռոստով, Կրասնոդար, Կազան քաղաքներից դեպի Բաքու թռիչքներ իրականացնել, յուրաքանչյուրը՝ շաբաթական երկու անգամ հաճախականությամբ:

«North Wind» ավիաընկերությունն էլ Սոչի-Բաքու չվերթն իրականացնելու թույլտվություն է ստացել՝ շաբաթական 7 անգամ հաճախականությամբ։

Միևնույն ժամանակ, «Ռոսավիացիա»-ի կայքում նշվում է, որ այդ թույլտվությունների տրամադրման որոշումը հիմք կամ որոշում չէ՝ կարգադրության մեջ նշված միջազգային երթուղիներով թռիչքները վերսկսելու մասին։ Մուտքը ավիաընկերության իրավունքն է, որից նա կարող է օգտվել թռիչքների վերսկսման դեպքում։

Հավելենք, որ Արցախի գրավյալ Վարանդայի օդանավակայանի բացման արարողությունը տեղի էր ունեցել հոկտեմբերի 26-ին, որին մասնակցել էին Թուրքիայի ու Ադրբեջանի նախագահները։

Էմմա Չոբանյան