01.11.2024 | 23:19
Հրդեհ Գյումրու տներից մեկում
Հայտարարագրերը բացառապես էլեկտրոնային եղանակով կներկայացվեն․ Բադասյանը փոփոխություններ առաջարկեց․ ՏԵՍԱՆՅՈՒԹ
Տնտեսություն
16.12.2021 | 15:15
Աժ այսօրվա արտահերթ նիստում առաջին ընթերցմամբ խորհրդարանին ներկայացվեց հարկային և մաքսային ծառայությունների մասին օրենքներում լրացումներ և փոփոխություններ կատարելու մասին նախագծերի փաթեթ: ՀՀ պետական եկամուտների կոմիտեն առաջարկում է կատարել փոփոխություններ մաքսային և հարկային ծառայությունում աշխատակիցներ ընդունելու ընթացակարգում:
ՊԵԿ նախագահ Ռուստամ Բադասյանը նշեց, որ համակարգում բազմաթիվ փոփոխություններ են լինում թվային գործիքների ներդրմամբ ու դա ենթադրում է նոր մասնագիտացում ծառայողների շրջանում: Մասնավորապես, մաքսային հայտարարագրերի էլեկտրոնային համակարգի փոփոխությունները, որը ենթադրում է հայտարարագրերի ընդունում բացառապես էլեկտրոնային եղանակով: Այս համատեքստում բացառվելու է մաքսային մարմին-տնտեսվարող կապը: Այս փոփոխություններից ելնելով՝ մասնագետների վերապատրաստման, նոր մոտեցմամբ նրանց ընդունելու, վերապատրաստելու անհրաժեշտություն կա:
«Հարկային, մաքսային ծառայությունը տարբեր պարագաներում որոշակի նեղ մասնագիտական գիտելիքներ պահանջող աշխատանք է ենթադրում: Աշխատանքի ընդունման այսօրվա ընթացակարգերը, որոնցով մրցույթները կայանում են, կարելի է որակել ձևական, որովհետև դրանք, թեստավորման և հարցազրույցի միջոցով համակարգ ընդունված անձանց կողմից, պարտականությունները մասնագիտական գիտելիքներով կատարելու երաշխիք չեն տալիս: Մենք նախատեսել ենք ստեղծել ուսումնական կենտրոն, որի միջոցով պատրաստման ու վերապատրաստման դասընթացներ կանցկացվեն»,- նշեց ՊԵԿ Նախագահը:
Ռուստամ Բադասյանը տեղեկացրեց, որ նոր ընթացակարգն ամբողջությամբ ուժի մեջ կլինի 2024 թվականից, իսկ մինչ այդ, 2022 թվականի հունվարի 1-ից բոլոր այն ստորաբաժանումները, որոնք կվերակազմակերպվեն, արդեն այդտեղ ծառայողների ընդունելությունը կլինի նոր ընթացակարգով:
Մանրամասները՝ տեսանյութում:
