16.04.2026 | 23:27
Ինչ իրավիճակ է Հայաստանի ճանապարհներին և Լարսում
Թուրքական լիրայի անկայունությունը վերջին 20 տարիների ամենաբարձր մակարդակին է հասել
Տնտեսություն
15.12.2021 | 17:02
Թուրքական լիրայի անկայունությունը հասել է վերջին ավելի քան 20 տարվա ամենաբարձր մակարդակին՝ արտացոլելով արժույթի ամենաօրյա ռեկորդային անկումները, գրում է «Ահվալ» գործակալությունը։
Նշվում է, որ անկայունության կանխատեսումը կազմել է 30,9 տոկոս՝ համաձայն V-Lab-ի՝ ԱՄՆ դոլարի նկատմամբ թուրքական լիրայի GARCH վերլուծության: Անցած ամսվա ընթացքում այն մնացել է նույնանման մակարդակում կամ ավելի բարձր է եղել՝ նոյեմբերի 25-ին հասնելով ավելի քան 70 տոկոսի:
2018 թվականին արժութային ճգնաժամի ընթացքում օրական փոփոխականությունը հասել է 70 տոկոսի։
Նշենք, որ օրերս թուրքական լիրան արժեզրկման նոր ռեկորդ էր գրանցել՝ գերազանցելով մեկ դոլարի դիմաց 14 լիրայի ցուցանիշը։ Թուրքական արժույթը սկսեց արժեզրկվել այն բանից հետո, երբ երկրի նախագահ Ռեջեփ Թայիփ Էրդողանը մարտից Կենտրոնական բանկի քաղաքականությունը վերցրեց իր հսկողության տակ և հրահանգեց նվազեցնել տոկոսադրույքները՝ չնայած արագացող գնաճին։
Նոյեմբերի 23-ին լիրան արժեզրկվել էր 15 տոկոսով՝ երկու տասնամյակի ամենամեծ անկումը։ Սա տեղի ունեցավ այն ժամանակ, երբ Էրդողանը հայտարարեց «տնտեսական անկախության քաղաքականության մասին»։
Թուրքիայում սպառողական գնաճը նոյեմբերին հասել է 23․1 տոկոսի, արտադրողների տարեկան գնաճը՝ 54 տոկոսի։ Որոշ տնտեսագետներ նշում են, որ դեկտեմբերին այն կհասնի 25 և ավելի տոկոսի։ Հաղորդվում է, որ Կենտրոնական բանկը հինգշաբթի տոկոսադրույքների հարցով նիստ է անցկացնելու։
Էմմա Չոբանյան
