30-ից ավելի քննարկում է եղել, վերհանվել են քաղհասարակության խնդիրները․ Դավիթ Հովհաննիսյան․ ՏԵՍԱՆՅՈՒԹ

Կազմակերպագործունեական սեմինարի ընթացքում 30-ից ավելի քննարկումներ են կազմակերպվել, վերհանվել են քաղհասարակության խնդիրները։ Դրա հիմնական նպատակն է՝ նախ գնահատել, տեսնել, թե ինչ վիճակում է գտնվում մեր հասարակությունը, երկրորդ՝ փորձել հասկանալ, թե ինչ հնարավորություններ կան այդ վիճակի շտկման, կարգավորման համար, և երրորդ՝ կոնկրետ ծրագրեր ու գործողությունների մոդուսներ ձևավորել, որոնք արդեն պետք է առաջարկվեն հանրությանը։ «Քաղաքացիական հասարակության գործունեության վերաիմաստավորումը Հայաստանում ճգնաժամի պայմաններում» կազմակերպագործունեական սեմինարի արդյունքների ներկայացման ժամանակ այս մասին ասաց դիվանագետ Դավիթ Հովհաննիսյանը։

Նա ներկայացրեց սեմինարի արդյունքում բացահայտված մի խնդիրներ։

«Դա աշխարհի պատկերի ընդհանուր աղավաղումը, աղճատումն է։ Ընթացքում ակնհայտ դարձավ, որ մասնակիցների համար շատ պրոցեսներ ուղղակի հասկանալի չեն: Խաղի ժամանակ գործողության մի մոդել ձևակերպվեց, որը անվանվեց «եթե-ապա»՝ եթե այսպես ես անում, ապա այսպես պիտի լինի։ Այդ «եթե-ապա»-ն խախտվել է»,- ասաց բանախոսը։

Երկրորդը, ըստ նրա, որը շատ կարևոր էր, դարձյալ կապված է աշխարհի պատկերի աղավաղման հետ։

«Հասկանալի է, որ այս աղավաղման հիմքը, բնականաբար, արժեքային համակարգի քայքայումն է, դրանց ոչ պարտադիր լինելը, հայտարարված, բայց չկիրառված լինելը։ Եվ ավելի լուրջ խնդիր՝ արժեքային համակարգերի միջև մրցակցությունը, կարծես, չի քննարկվում և չի դիտարկվում, այսինքն՝ ինչն է ավելի կարևորը, ինչն է հիմքում ընկած, ինչն է, որ արժեք ունի։ Այս հարցերը, կարծես, չեն քննարկվում։ Եվ այստեղից՝ մի քանի այլ խնդիրներ, որոնք նույնպես բավականին մեծ հարցականներ են առաջ քաշում մեր հասարակության առջև»,- նշեց Դավիթ Հովհաննիսյանը։

Մանրամասները՝ տեսանյութում։