22.08.2026 | 21:13
Դիլիջան-Վանաձոր ճանապարհին ավտոմեքենան դուրս է եկել երթևեկելի հատվածից և բախվել հողաթմբին
Լա Մանշում ներգաղթյալների տեղափոխող նավի խորտակման հետևանքով 27 մարդ է զոհվել
Քաղաքականություն
25.11.2021 | 12:54
Առնվազն 27 ներգաղթյալ է զոհվել Լա Մանշի նեղուցով Ֆրանսիայից Մեծ Բրիտանիա տեղափոխվելու փորձի ժամանակ։ Միգրացիայի միջազգային կազմակերպությունը հայտնել է, որ սա 2014 թվականից ի վեր ամենախոշոր ողբերգությունն է Լա Մանշում միգրանտների հետ կապված։
BBC-ի տվյալներով՝ Բրիտանիայի միգրացիոն իշխանություններն ափ են հանել ներգաղթյալների մի մասին, որոնց հաջողվել է փոքր նավակներով հասնել ափ։ Ընդհանուր առմամբ, Լա Մանշը հատելու փորձ է ձեռնարկել շուրջ 25 փոքր նավ։
Ֆրանսիական La Voix Du Nord-ի հաղորդմամբ՝ փոխադրամիջոցը կարող էր խորտակվել կոնտեյներային նավի հետ բախման արդյունքում։ Պաշտոնապես այս տեղեկությունը չի հաստատվել։
Լա Մանշն աշխարհի ամենաբանուկ նեղուցն է. ամեն օր դրա միջով անցնում է ավելի քան 500 նավ։ Նավերով Բրիտանիա հասած անօրինական միգրանտների թիվը վերջին մեկ տարվա ընթացքում եռապատկվել է՝ կազմելով գրեթե 30 հազար մարդ։ Վերջին մի քանի շաբաթվա ընթացքում առնվազն 10 մարդ է մահացել՝ փորձելով լողալով անցնել Լա Մանշը։
Մեծ Բրիտանիայի վարչապետ Բորիս Ջոնսոնը երեկ խոստացել է ոչնչացնել մաքսանենգների բիզնեսը, որոնք զբաղվում են մարդկանց անօրինական փոխադրմամբ։
Ֆրանսիայի իշխանությունները հայտնել են, որ տարեսկզբից ավելի քան 1500 մարդ է ձերբակալվել՝ միգրանտների տեղափոխմանն առնչություն ունենալու կասկածանքով։
Տաթև Ֆռանգյան
