18.01.2026 | 15:00
WP․ Պենտագոնը պատրաստվում է դեսանտայիններին ուղարկել Մինեսոտա
ԱՄՆ-ը նոր պատժամիջոցներ է սահմանել «Հյուսիսային հոսք 2»-ի դեմ
Քաղաքականություն
23.11.2021 | 14:18
ԱՄՆ-ը մտադիր է լրացուցիչ պատժամիջոցներ կիրառել «Հյուսիսային հոսք 2» գազատարի դեմ, որն անցնում է Ռուսաստանից դեպի Գերմանիա։ Նոյեմբերի 22-ին ԱՄՆ Պետքարտուղարությունը հայտարարել է, որ պատժամիջոցներ կկիրառվեն Transadria LtD-ի նկատմամբ, որը զբաղվում էր գազամուղի կառուցմամբ և կապված է Ռուսաստանի հետ, իսկ Merlin նավը կհայտարարվի առգրավված, գրում է DW-ի ռուսական ծառայությունը։
Այսպիսով՝ «Հյուսիսային հոսք 2» գազատարի հետ կապված պատժամիջոցների տակ են հայտնվում, ընդհանուր առմամբ, 8 իրավաբանական և ֆիզիկական անձինք, ինչպես նաև նրանց պատկանող 17 նավ։
Պետքարտուղար Էնթոնի Բլինքենը նշել է, որ Կոնգրեսին ներկայացնելով եռամսյակային զեկույց՝ հիմնված Էներգետիկ անվտանգության եվրոպական ակտի (PEESA) պաշտպանության վրա, նոր սահմանափակող միջոցների ներդրումը համահունչ է ԱՄՆ Պետքարտուղարության դիրքորոշմանը, որը դեմ է գազատարի կառուցմանը, որով գազը Ռուսաստանից կհոսի Գերմանիա՝ շրջանցելով Ուկրաինան։
Միևնույն ժամանակ, նրա խոսքով, Գերմանիայի և այլ դաշնակիցների հետ համագործակցությունը կշարունակի նվազեցնել Ուկրաինայի և Արևելյան Եվրոպայի՝ ՆԱՏՕ-ի անդամ հանդիսացող երկրների համար ռիսկերը։ «Հյուսիսային հոսք 2»-ի կառուցման հակառակորդներն այն առաջին հերթին դիտարկում են որպես ռուսական աշխարհաքաղաքական նախագիծ:
Հուլիսին Գերմանիայի կառավարությունը և ԱՄՆ նախագահ Ջո Բայդենի վարչակազմը հայտարարեցին վիճահարույց նախագծի շուրջ տասնամյակներ շարունակվող հակամարտությունում առաջընթացի մասին: Նրանք համատեղ հայտարարություն տարածեցին, որում աջակցություն էին խոստանում Ուկրաինային։ ԱՄՆ-ը պարտավորվել էր այլևս չխոչընդոտել գազատարի կառուցմանը՝ այլ երաշխիքներ տալով Ուկրաինային։ Ուստի նախ Վաշինգտոնը ձեռնպահ մնաց ավելի արմատական պատժամիջոցներ կիրառելուց, օրինակ՝ նախագծի օպերատորի՝ Շվեյցարիայում գրանցված «Գազպրոմի» դուստր ձեռնարկության դեմ։
Տաթև Ֆռանգյան
