24.01.2026 | 02:44
Հենրիխ Մխիթարյանն առաջին գոլն է խփել այս մրցաշրջանում․ ՏԵՍԱՆՅՈՒԹ
ՀՀ-ում անցյալ շաբաթ շուրջ 5 դպրոց անցել է հեռավար ուսուցման․ որոշումը կայացնում են հաստատությունները
Հասարակություն
25.10.2021 | 16:25
Անցյալ շաբաթվա դրությամբ Հայաստանի Հանրապետությունում 5 դպրոց ամբողջությամբ անցել է հեռավար ուսուցման․ Factor.am-ին հայտնեցին Կրթության, գիտության, մշակույթի և սպորտի նախարարության տեղեկատվության և հասարակայնության հետ կապերի վարչությունից։
Հեռավար ուսուցման անցած դպրոցներն են․ Երևանում գործող «Հայ կրթություն» հիմնադրամ մասնավոր դպրոցը, Դիլիջանի ավագ դպրոցը, Կապանի թիվ 2 ավագ դպրոցը, Շիրակի մարզի Լուսաղբյուր ու Սարատակ գյուղերի միջնակարգ դպրոցները։
Առկա ուսման տարբերակից հեռավար անցնելու ժամանակահատվածը տևում է 2 շաբաթ։ Եթե երկու շաբաթ անց նոր դեպքեր են արձանագրվում, ապա խնդրին նոր ընթացք է տրվում։
Յուրաքանչյուր դպրոցի տնօրեն ինքն է որոշում անցնել հեռավար ուսուցման, եթե կորոնավիրուսային հիվանդությունն տարածման մակարդակը հաստատությունում գերազանցում է 10 տոկոսը։
«Դպրոցների տնօրենները դիմել են վերադաս մարմիններին՝ մարզպետարաններին, քաղաքապետարաններին, նախարարության ենթակայության տակ գործող դպրոցների դեպքում՝ նախարարությանը՝ հեռավար կրթություն կազմակերպելու վերաբերյալ։
Ունեցել ենք նաև բազմաթիվ դեպքեր, երբ դպրոցներում հեռավար կրթության անցնելու հարցերը կարգավորվել են տեղային տարբերակով։ Օրինակ, եթե մեկ դասարանում է կոնկրետ բռնկում եղել, ապա միայն այդ դասարանների մակարդակով են անցում կատարել հեռավար կրթության»,- մանրամասնեցին նախարարությունից։
Մասնակի հեռավար կրթության անցած դպրոցները շուրջ մեկ տասնյակ են՝ ներառելով մեկ կամ երկու դասարան։ Սեպտեմբերից սկսած դպրոցները պարբերաբար անցել են հեռավար տարբերակի և երկու շաբաթ անց՝ կրկին առկա ուսուցման։
ԿԳՄՍՆ-ից ասում են՝ այս տարբերակն արդյունավետ է եղել, և վարակը չի տարածվել։
Հնարավո՞ր է՝ դպրոցներն անցնեն հեռավար տարբերակի, սակայն ԿԳՄՍՆ-ն չիմանա այդ մասին, հարցրինք ԿԳՄՍՆ աշխատակցին։ «Իրենք որոշումը կայացնում են և իրազեկում վերադասին․ հնարավոր չէ, որ նախարարությունը տեղյակ չլինի, ներկայացնում են նաև որոշման պատճառը»,- ասացին նախարարությունից։
ԿԳՄՍ նախարարությունն արդեն դիմե՞լ է բուհերի ռեկտորներին՝ հեռավար կրթության անցնելու հետ կապված․ օրվա ընթացքում նախարարությունն այս մասին հայտարարություն կտարածի։
Արփի Հակոբյան
