Քաղաքականություն
21.10.2021 | 17:53
Դեղամիջոցների եվրոպական գործակալությունը (EMA) Sputnik V կորոնավիրուսի դեմ ռուսական պատվաստանյութի սերտիֆիկացման հարցով առնվազն մինչև 2022 թվականի առաջին եռամսյակը որոշում չի կայացնի: Այս մասին հայտնում է Reuters- ը՝ հղում անելով տեղեկացված աղբյուրին:
Գործակալության զրուցակցի խոսքով՝ պատվաստանյութի հաստատման մասին որոշումը «բացարձակապես անհնար է» մինչև 2021 թվականի վերջը՝ հայտի քննարկման համար անհրաժեշտ որոշ տվյալների բացակայության պատճառով: Հավաստագրման գործընթացը հաջորդ տարվա սկզբին ավարտելու համար անհրաժեշտ տվյալները պետք է ներկայացվեն մինչև նոյեմբերի վերջ:
Միաժամանակ, աղբյուրը հավելել է, որ կարգավորիչը հիմքեր չունի կասկածելու ռուսական պատվաստանյութի արդյունավետությանն ու անվտանգությանը։
Reuters-ի հրապարակումից հետո ՌԴ առողջապահության նախարարի օգնական Ալեքսեյ Կուզնեցովն ասել է, որ EMA-ի կողմից լրացուցիչ պահանջվող փաստաթղթերի պատրաստումն արդեն ավարտված է։ Նա նաև հույս է հայտնել, որ մինչև տարեվերջ եվրոպական կարգավորիչի ներկայացուցիչները ստուգմամբ կայցելեն Ռուսաստան:
ՌԴ նախագահի խոսնակ Դմիտրի Պեսկովն էլ ասել է, որ Եվրոպայում կորոնավիրուսի դեմ Sputnik V պատվաստանյութի գրանցման հետ կապված խոչընդոտն առաջացել է «բացառապես տեխնիկական ձևականությունների պատճառով» և կլուծվի աշխատանքային կարգով:
Տաթև Ֆռանգյան
