14.09.2026 | 18:19
Փաշինյանն ու Բունդեսթագի պատվիրակությունը քննարկել են Հայաստան–Գերմանիա և Հայաստան–ԵՄ հարաբերությունները
Դատավորը մերժեց կնոջ մահափորձի գործով համալիր փորձաքննություն անցկացնելու մասին միջնորդությունը
Հասարակություն
11.10.2021 | 16:06
Այսօր Երևան քաղաքի ընդհանուր իրավասության դատարանի դատավոր Մարինե Մելքոնյանը մերժեց կնոջ նկատմամբ մահափորձ իրականացնելու մեջ մեղադրվող տղամարդու պաշտպանի միջնորդությունը, որը վերաբերում էր դատահոգեբուժական և դատահոգեբանական համալիր փորձաքննության անցկացնելուն։ Պաշտպան Լիպարիտ Սիմոնյանը մի շարք հարցեր էր առաջարկում տալ փորձագետին, որոնք վերաբերում են ամբաստանյալ Ռ․Ն․-ի հոգեկան առողջությանը և մեղսունակությանը։
Մեղադրող դատախազն ու տուժողի ներկայացուցիչը նախորդ նիստին առարկել էին միջնորդության դեմ՝ պնդելով, որ տղամարդու մեղսունակությունն արդեն իսկ ապացուցվել է նախաքննության փուլում իրականացրած փորձաքննությամբ։
Հաջորդ դատական նիստը նշանակվել է հոկտեմբերի 21-ին՝ 16։00-ին։ Այդ օրը կողմերը պետք է հանդես գան ճառերով։
Հիշեցնենք, որ ըստ մեղադրանքի՝ մահափորձը տեղի է ունեցել տանը՝ խոհանոցում․ ամուսինն անսպասելի թիկունքից մոտեցել է կնոջը, դանակը պարզել կոկորդին, ապա բազմաթիվ հարվածներ հասցրել։ Երկու անչափահաս երեխաները տանն են եղել, հենց նրանց շնորհիվ է հնարավոր եղել փրկել մոր կյանքը։ Կնոջ՝ Ս․Ն․-ի մարմնի վրա առնվազն 13 կտրած-ծակած վերքեր են հայտնաբերվել հիվանդանոցում։ Նրա կյանքը հնարավոր է եղել փրկել, սակայն դեպքից ավելի քան 7 ամիս անց նա դեռևս առողջական խնդիրներ ունի, դժվարությամբ է քայլում։
Արման Ղարիբյան
Նկարազարդումը՝ Ելենա Ակոջյանի
