Կորոնավիրուսով հիվանդացության թվերն աճել են, օրական հաստատվող դեպքերը հասել են մինչև 1300-ի, ավելացել է նաև մահվան դեպքերի թիվը: Այս մասին Factor.am-ի հետ զրույցում նշեց «Քաղաքացիական պայմանագիր» խմբակցության պատգամավոր Կարեն Զեյնալյանը:
«Մյուս կողմից՝ մեծ հակազդեցություն կա. հակապատվաստանյութային շարժումներ կան՝ տարբեր դավադրությունների տեսությունների կողմնակիցներն ակտիվ ինֆորմացիաներ են տարածում և հասարակության կարծիքները երկատվում են, և անգամ այն մարդիկ, ովքեր որոշել էին պատվաստվել, հետ են կանգնում այդ մտքից: Ցավոք այդ շարժման կողմնակիցների թվում կան նաև բժիշկներ»,- նշեց Զեյնալյանը՝ հավելելով, որ հնարավոր է խստացումներն ուժեղացվեն և չպատվաստված անձանց կորոնավիրուսով հիվանդանալու դեպքում բուժումը դառնա վճարովի, որպեսզի հնարավոր լինի պատվաստումների քանակ ապահովել և պատշաճ ձևով հանրային առողջությունը պահպանել:
Անդրադառնալով քաղաքացիների մի հատվածի դժգոհություններին առ այն, որ դիմել են կոնկրետ տեսակի պատվաստանյութով պատվաստվելու համար, սակայն իրենց պատասխանել են, որ չունեն, Զեյնալյանը նշեց, որ բոլոր պատվաստանյութերի ազդեցությունը գրեթե համարժեք է և կողմնակի ազդեցությունները համանման են. «Եվ եթե անձը դիմել է պոլիկլինիկա և տվյալ պատվաստանյութը չի եղել, դա չի նշանակում, որ պատվաստանյութի սուղ քանակ ունենք»:
Մանրամասները՝ տեսանյութում:
