16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
ԱՄՆ-ի և Չինաստանի ղեկավարները կարող են հանդիպել մինչև տարեվերջ
Քաղաքականություն
07.10.2021 | 15:40
ԱՄՆ նախագահ Ջո Բայդենը և Չինաստանի ղեկավար Սի Ձինպինը սկզբունքային համաձայնության են եկել մինչև տարեվերջ վիրտուալ գագաթնաժողով անցկացնելու վերաբերյալ։ Այս մասին լրագրողներին ասել է Սպիտակ տան բարձրաստիճան պաշտոնյան, գրում է BBC-ի ռուսական ծառայությունը:
Որոշումը կայացվել է Ցյուրիխում Բայդենի ազգային անվտանգության հարցերով խորհրդական Ջեյք Սալիվանի և Չինաստանի Կոմունիստական կուսակցության կենտրոնական հանձնաժողովի քաղբյուրոյի անդամ Յան Ցզեչիի միջև երկարատև բանակցություններից հետո:
Սպիտակ տան խոսնակ Ջեն Փսակին ճեպազրույցի ժամանակ ասել է, որ հանդիպման ձևաչափը և ժամկետը մշակվում են, այլ մանրամասներ ևս դեռ համաձայնեցված չեն:
Վերջին շաբաթներին Պեկինը ռեկորդային թվով ռազմական ինքնաթիռներ է ուղարկել Թայվանի օդային տարածք, ինչը սուր քննադատության է արժանացել ԱՄՆ պետքարտուղար Էնթոնի Բլինքենի և Բայդենի վարչակազմի այլ պաշտոնյաների կողմից։ Նախօրեին էլ Թայվանին պաշտպանության նախարար Չիու Կուո Չենը հայտարարել է, որ տարածաշրջանում զինված հակամարտության վտանգն ամենաբարձր մակարդակի վրա է վերջին 40 տարիների ընթացքում։
Տարածաշրջանում ռազմական լարվածության վերջին լուրջ սրացումը տեղի է ունեցել 1996 թվականին, երբ Թայվանում նախագահական ընտրությունների նախաշեմին Պեկինը ցուցադրել է հրթիռային փորձարկումներ, իսկ ԱՄՆ-ն իր ավիակիրներն է ուղարկել տարածաշրջան:
Տաթև Ֆռանգյան
