Տնտեսություն
07.10.2021 | 15:16
Եվրոպայում գազի գինը, հոկտեմբերի սկզբից ի վեր առաջին անգամ, նվազել է 1000 դոլարից՝ հազար խորանարդ մետրի դիմաց։ Այս մասին են վկայում ICE Futures բորսայի տվյալները, հաղորդում է ՌԻԱ Նովոստին:
Նիդերլանդական TTF ինդեքսի նոյեմբերյան ֆյուչերսները սակարկության մեկնարկին եղել են հազար խորանարդ մետրի դիմաց շուրջ 1260 դոլար, հետո հասել 1370 դոլարի, այնուհետև նվազել՝ հասնելով 981,1 դոլարի (24 տոկոսով ցածր նախորդ օրվա 1,300 դոլարից):
Նախօրեին գազի եվրոպական շուկան թարմացրել էր պատմական առավելագույն ցուցանիշը՝ հազար խորանարդ մետրի դիմաց հասնելով 1937 դոլարի, սակայն դրանից հետո՝ կտրուկ նվազել՝ սակարկությունների ավարտին հասնելով 1260 դոլարի:
Վերջին շաբաթների ընթացքում գազի եվրոպական շուկայում աժիոտաժ էր տիրում. եթե օգոստոսի սկզբին վառելիքի մատակարարման արժեթղթերը վաճառվում էին 515 դոլարով՝ հազար խորանարդ մետրի համար, ապա մեկ ամիս անց դրանք հասան 614 դոլարի, սեպտեմբերին կրկնակի թանկացան, իսկ վերջին երեք օրերին՝ մոտեցան երկու հազար դոլարի շեմին։
Փորձագետները դա պայմանավորում են գազի պահուստարանների լցվածության ցածր մակարդակով, հիմնական մատակարարների կողմից առաջարկի սահմանափակմամբ և Ասիայում բարձր պահանջարկով։
