26.06.2026 | 14:46
Նիդերլանդների ԱԳՆ ներկայացուցչի հետ քննարկվել են հայկական արտադրանքի արտահանման հնարավորությունները դեպի ԵՄ
Համաշխարհային բանկը ՀՀ համար մինչև 6,1% տնտեսական աճ է կանխատեսել
Տնտեսություն
06.10.2021 | 16:45
Համաշխարհային բանկը (ՀԲ) գրեթե կրկնակի անգամ մեծացրել է 2021 թվականին Հայաստանի տնտեսական աճի կանխատեսումը՝ հասցնելով մինչև 6,1%-ի։ Այս մասին ասված է Եվրոպայի և Կենտրոնական Ասիայի երկրների հետկորոնավիրուսային վերականգնման վերաբերյալ ՀԲ զեկույցում:
Նշվում է, որ տնտեսության վերականգնումը կապված է ոչ թե կառուցվածքային փոփոխությունների (արդյունաբերական աճ, նոր գործարանների բացում և այլն), այլ մասնավոր սպառման վերականգնման հետ, որոնք ժամանակավոր դադար էին գրանցել ճգնաժամային շրջանում, այդ թվում՝ պղնձի համաշխարհային գների աճի, զբոսաշրջիկների ներհոսքի, ինչպես նաև բյուջեի միջոցներով կապիտալ շինարարության ակտիվացման հետ: 2020 թվականին երկրի տնտեսությունը կրճատվել էր 7,4%-ով՝ կորոնավիրուսային համաճարակի և 44-օրյա պատերազմի արդյունքում:
2021 թվականի վերականգնումը սպասվածից արագ է ընթանում․ առաջին կիսամյակում՝ 4.9%-ով, և մինչև 2022 թ. կեսերը տնտեսությունը կարող է վերադառնալ մինչճգնաժամային մակարդակի:
Այնուամենայնիվ, ՀԲ փորձագետները նշում են, որ զարգացած երկրների համեմատ՝ Հայաստանում ցածր է պատվաստումների մակարդակը և բարձր է կորոնավիրուսով հիվանդացության դեպքերի աճը: Նշվում է, որ համաճարակային և աշխարհաքաղաքական ռիսկերը կարող են ազդել տնտեսության վերականգնման վրա:
Զեկույցում ասվում է, որ պետությունը հատկացրել է 25 ծրագիր կարիքավոր ընտանիքներին և ձեռնարկություններին աջակցելու համար, ինչի արդյունքում պետական պարտքը հասել է ՀՆԱ-ի 67%-ի: Այնուամենայնիվ, այն բոլոր ցուցանիշներով մնում է վերահսկելիության սահմաններում:
Վերահսկելի են մնում նաև բանկային հատվածի ռիսկերը՝ շնորհիվ դրանց կապիտալի հուսալիության։ Հիմնականում տնտեսությունը վերականգնվում է առևտրի ու ծառայությունների հաշվին, մինչդեռ գյուղատնտեսության ու արդյունաբերության ոլորտում աճի տեմպերն այդքան բարձր չեն եղել։
Տաթև Ֆռանգյան
