14.09.2026 | 15:21
Չենք կարող բացառել, որ էսկալացիան կազդի նաև մեր տարածքի վրա․ Լեհաստանի վարչապետը՝ ռուսական հարվածների մասին
Ադրբեջանի և Վրաստանի ՊՆ ղեկավարները երկկողմ համագործակցության վերաբերյալ փաստաթուղթ են ստորագրել․ ԼՈՒՍԱՆԿԱՐՆԵՐ
Քաղաքականություն
05.10.2021 | 13:16
Ադրբեջանի պաշտպանության նախարար Զաքիր Հասանովը, որը պաշտոնական այցով գտնվում է Վրաստանում, հանդիպել է իր վրացի գործընկերոջ Ջուանշեր Բուրչուլաձեի հետ։ Այս մասին հաղորդում են ադրբեջանական լրատվամիջոցները՝ վկայակոչելով ՊՆ-ին։
Նշվում է, որ կողմերը կարծիքներ են փոխանակել ռազմական ոլորտում երկկողմ համագործակցության տարբեր ուղղությունների և փոխադարձ հետաքրքրություն ներկայացնող այլ հարցերի շուրջ։
«Անդրադառնալով տարածաշրջանում ռազմաքաղաքական իրավիճակին՝ կողմերն ընդգծել են տարածքային ամբողջականության փոխադարձ աջակցման կարևորությունը՝ համոզմունք հայտնելով, որ երկկողմ ռազմական համագործակցության զարգացումը կնպաստի տարածաշրջանում կայունության և անվտանգության ապահովմանը»,- ասվում է հաղորդագրության մեջ։
Հասանովը նաև Վրաստանին երախտագիտություն է հայտնել Արցախյան 44-օրյա պատերազմում «Ադրբեջանի արդարացի դիրքորոշմանն աջակցելու համար»։
Բանակցությունների արդյունքում երկու երկրների պաշտպանության նախարարները ստորագրել են երկկողմ համագործակցության ծրագիրը։
Նշենք, որ նախօրեին Թբիլիսիում մեկնարկել են «Eternity-2021» զորավարժությունները՝ Վրաստանի, Թուրքիայի և Ադրբեջանի զինծառայողների մասնակցությամբ, որը տևելու է մինչև հոկտեմբերի 8-ը։ Բացի այդ, վրացական Կախեթիում սպասվում է Վրաստանի, Ադրբեջանի և Թուրքիայի պաշտպանության նախարարների եռակողմ հանդիպումը։
Էմմա Չոբանյան
