Քաղաքականություն
29.09.2021 | 19:15
ԱՀԿ-ի և ՄԱԿ-ի աշխատակիցներին մեղադրել են Կոնգոյի Դեմոկրատական Հանրապետությունում սեռական բռնություն իրականացնելու մեջ։ Անկախ հանձնաժողովը լուրջ մեղադրանքներ է առաջադրել Առողջապահության համաշխարհային կազմակերպության, ՄԱԿ-ի և այլ հումանիտար առաքելությունների աշխատակիցների կողմից սեռական շահագործման հետ կապված: Այս մասին գրում է DW-ի ռուսական ծառայությունը։
Եզրափակիչ զեկույցի համաձայն՝ այդ կազմակերպությունների աշխատակիցները Կոնգոյի Դեմոկրատական Հանրապետությունում արևադարձային «էբոլա» հիվանդության դեմ պայքարի ժամանակ տասնյակ մարդկանց սեռական բռնության են ենթարկել։ Հանցագործություններն իրականացվել են 2018 թվականի օգոստոսից մինչև 2020 թվականի հունիսը։
35 էջանոց փաստաթուղթը վերաբերում է ահռելի ծավալների հասնող «սեռական շահագործմանն ու չարաշահումներին»: Հանձնաժողովը զրուցել է 75 զոհերի հետ, որոնցից 63-ը կանայք են, 12-ը՝ տղամարդիկ: Տուժածների խոսքով՝ ԱՀԿ-ի և այլ կազմակերպությունների աշխատակիցներն աշխատանք են խոստացել սեռական ծառայությունների դիմաց։ Բացի այդ, եղել են նաև բռնաբարության դեպքեր, առնվազն 29 կին հղիացել է։ Կասկածյալները 83ճն են, նրանցից 21-ը՝ ԱՀԿ աշխատակից։
Զոհերի և ենթադրյալ հանցագործների թիվը կարող է ավելի շատ լինել, վերջնական ցուցակը դեռևս կազմված չէ, ասվում է զեկույցում:
ԱՀԿ-ի գլխավոր տնօրեն Թեդրոս Գեբրիեսուսը ներողություն է խնդրել կազմակերպության աշխատակիցների կողմից Կոնգոյում սեռական բռնության դեպքերի համար:
Տաթև Ֆռանգյան
