Քաղաքականություն
28.09.2021 | 19:50
Ադրբեջանում դժգոհ են Լեռնային Ղարաբաղի հակամարտության հումանիտար հետևանքների վերաբերյալ Եվրախորհրդի Խորհրդարանական վեհաժողովի (ԵԽԽՎ) ընդունած բանաձևից։
Մասնավորապես, ԵԽԽՎ-ում ադրբեջանական պատվիրակության ղեկավար Սամեդ Սեիդովն ասել է, թե, իբր, «Եվրոպայի խորհրդի հայամետ լոբբին բանաձևում Ադրբեջանի մասին կեղծ տեղեկատվություն է ներառել»։
«Ես ողջունում եմ այդ բանաձևի ընդունումը, քանի որ այն մի շարք հարցեր է ներառում, որոնք արտացոլում են Ադրբեջանի ազգային շահերը։ ԵԽԽՎ-ն ընդունում է նոր իրավիճակը, և մեր առաջարկած փոփոխությունները բանաձևում ընդունվել են։ Սակայն մենք ստիպված դեմ ենք քվեարկել փաստաթղթին, քանի որ հայկական լոբբիի աջակցությամբ, որն ապրում է իր սեփական երևակայությամբ, ներառվել են զրպարտիչ գաղափարներ»,- ասել է Սեիդովը ադրբեջանական Report-ի հետ զրույցում։
Trend-ի հետ զրույցում էլ ԵԽԽՎ բանաձևից բողոքել է ադրբեջանական Մեջլիսի պատգամավոր Էլման Նասիրովը։ Նա նշել է, որ ԵԽԽՎ ներկայացուցիչների նման քայլը «հակասում է միջազգային իրավունքին ու այդ փաստաթուղթը կրկին վկայում է Ադրբեջանի նկատմամբ երկակի ստանդարտների կիրառման մասին»։
Հիշեցնենք, որ նախօրեին ԵԽԽՎ-ն աշնանային և եզրափակիչ նստաշրջանի շրջանակում ընդունել էր Լեռնային Ղարաբաղի հակամարտության հումանիտար հետևանքների վերաբերյալ բանաձև, որին դեմ էին քվեարկել Ադրբեջանի ու Թուրքիայի պատվիրակները։
Էմմա Չոբանյան
