27.11.2024 | 11:38
7 ոստիկան ազատվել է աշխատանքից
Մակրոնը հայտնել է Ֆրանսիայի դեսպանին Վաշինգտոն վերադարձնելու մասին
Քաղաքականություն
28.09.2021 | 14:22
ԱՄՆ-ում Ֆրանսիայի դեսպան Ֆիլիպ Էթիենը, որը միջուկային սուզանավերի կառուցման վերաբերյալ ամերիկա-բրիտանա-ավստրալական համաձայնագրի շուրջ սկանդալի պատճառով խորհրդակցությունների համար Փարիզ էր կանչվել, սեպտեմբերի 29-ին կվերադառնա Վաշինգտոն: Այս մասին երեքշաբթի տեղի ունեցած ասուլիսի ժամանակ հայտնել է Ֆրանսիայի նախագահ Էմանուել Մակրոնը:
«Ֆրանսիայի դեսպանը վաղը կվերադառնա Վաշինգտոն՝ հստակ բանակցային մանդատով, համագործակցության վերսկսման պայմանների շուրջ քննարկումների համար»,- ասել է նա:
Մակրոնը հիշեցրել է, որ մեկ շաբաթ առաջ հեռախոսազրույց է ունեցել ԱՄՆ նախագահ Ջո Բայդենի հետ և «դրանից հետո ոչ մի նոր բան տեղի չի ունեցել»:
Նա ակնկալում է շարունակել երկխոսությունը Բայդենի հետ հոկտեմբերի կեսերին՝ հաստատելու համար «համագործակցության վերականգնման պայմանները», որոնք նախանշվել են առաջին զրույցի ընթացքում:
Հիշեցնենք, որ Ավստրալիան, Մեծ Բրիտանիան և Միացյալ Նահանգները սեպտեմբերի 15-ին հայտարարեցին անվտանգության ոլորտում նոր գործընկերության՝ AUKUS-ի մասին: Համաձայնության շրջանակում Ավստրալիան նախատեսում է, մասնավորապես, ամերիկյան տեխնոլոգիաների օգնությամբ առնվազն ութ միջուկային սուզանավ կառուցել, որոնցից առաջինները կսկսեն գործարկվել 2036 թվականին, ինչպես նաև իր սպառազինությունը համալրել ամերիկյան թևավոր հրթիռներով: Այդ պատճառով Կանբերան խզեց իր պատմության մեջ խոշորագույն պաշտպանական պայմանագիրը Ֆրանսիայի հետ, ինչը Փարիզը որակեց «հարված մեջքին»:
Չինաստանը նախազգուշացրեց, որ AUKUS-ի ստեղծումը կխորացնի սպառազինությունների մրցավազքը, և միավորման անդամներին կոչ արեց հրաժարվել «սառը պատերազմի դարաշրջանի մտածելակերպից» և «նեղ աշխարհաքաղաքական հայեցակարգերից»:
Սուզանավերի գործարքի ֆոնին Փարիզը հայտարարեց խորհրդակցությունների համար ԱՄՆ-ից և Ավստրալիայից իր դեսպաններին անհապաղ հետ կանչելու մասին, սակայն հետ չկանչեց Մեծ Բրիտանիայում իր դեսպանին:
