16.12.2025 | 14:24
Քննարկվել են ՀՀ և Վրաստանի ՊՆ-ների միջև ռազմավարական հաղորդակցության ոլորտում համագործակցության ընդլայնման հարցեր
Գյումրու «Շիրակ» գերեզմանատանը կառուցվում է պանթեոն․ այնտեղ հուղարկավորված են 44 օրյա պատերազմի 81 զոհեր․ ԼՈւՍԱՆԿԱՐՆԵՐ
Հասարակություն
27.09.2021 | 19:34
Գյումրու «Շիրակ» գերեզմանատան պանթեոնում հուղարկավորված են 44-օրյա պատերազմի ժամանակ զոհված 81 հերոսներ։ Այն կառուցվում է Գյումրու քաղաքապետարանի և ՀՀ կառավարության համաֆինանսավորմամբ։
Նույնիսկ այսօր, երբ բազմաթիվ քաղաքացիներ, մարզային, քաղաքային իշխանության, ուժային և այլ կառույցների ներկայացուցիչներ այցելել էին՝ իրենց հարգանքի տուրքը մատուցելու, ծաղիկներ խոնարհելու զոհերի շիրիմներին, շինարարությունն ընթանում էր։
«Գյումրու քաղաքապետ Սամվել Բալասանյանը բազմիցս դիմեց կառավարությանը՝ խնդրելով կառուցել պանթեոնը։ Նախագիծ-նախահաշիվ կազմեցինք, ներկայացրեցինք, կառավարությունն էլ համաձայնեց։ Այժմ պանթեոնը կառուցվում է կառավարության և քաղաքապետարանի համաֆինանսավորմամբ։ Կառավարությունը հատկացրել է 93 միլիոն դրամ, Գյումրու քաղաքապետարանը՝ 29 միլիոն դրամ»,- Factor.am-ի հետ զրույցում ասաց Գյումրու գլխավոր ճարտարապետ Հենրիկ Գասպարյանը։
Շինարարությունը մեկնարկել է հուլիսի վերջերին, նախատեսում են ավարտին հասցնել մեկ ամից։
«Չենք շտապում, որովհետև մեզ համար կարևորը որակն է։ Այս պանթեոնում միայն 44-օրյա պատերազմի հերոսներն են հուղարկավորված, ապրիլյան պատերազմի հերոսների պանթեոնն այն ժամանակ էինք սարքել։ Այստեղ հուղարկավորված է 81 հերոս։ Նրանց թիվը շատ է, բայց մյուսներին այլ գերեզմանոցներում են հողին հանձնել՝ իրենց ընտանեկան գերեզմանոցներում»,- հավելեց նա։
Գլխավոր ճարտարապետը նաև տեղեկացրեց, որ գրանիտե շիրմաքարերը լրիվ պատրաստ են, այս պահին ընթանում են նկարների և անունների փորագրման աշխատանքները։
«Շինարարության վերջնական փուլն է, բետոնն արված է, կողքի քարերը լրիվ շարված են, սալիկապատումն ահագին արված է, մնացել է շիրմաքարերի տեղադրումը», -ասաց Հենրիկ Գասպարյանը։
Եվ մեկ հուշաքար Գյումրու քաղաքապետարանը կառուցում է երկրորդ գերեզմանոցում, որտեղ ևս 44-օրյա պատերազմի զոհեր են հուղարկավորված։
Արմիկ Մովսիսյան
