Մշակույթ
26.09.2021 | 18:24
Լոռու մարզի Ալավերդի քաղաքում սեպտեմբերի 25-ին հանդիսավորությամբ բացվեց «Թատերական Լոռի» 29-րդ միջազգային փառատոնը, որը նվիրված է Վանաձորի Հովհաննես Աբելյանի անվան պետական դրամատիկական թատրոնի 90-ամյակին։
90-ամյա հոբելյանի կապակցությամբ Հովհաննես Աբելյանի անվան պետական դրամատիկական թատրոնի դերասանները շնորհավորանքներ, պատվոգրեր ու նվերներ ստացան Ալավերդու համայնքապետի կողմից։
Ապա Վանաձորի Հովհաննես Աբելյանի անվան պետական դրամատիկական թատրոնի տնօրեն Լուսինե Սահակյանը բարի ընթացք մաղթեց «Թատերական Լոռի» 29-րդ միջազգային փառատոնին։ «Մեծ պատասխանատվություն է «Թատերական Լոռի» փառատոնը սկսել մեզանով, ինչը և՛ հաճելի է, և՛ պարտավորեցնող։ Թումանյանի «Անուշ»-ը, մեր «Անուշ»-ը սիրով բերել ենք Ալավերդի՝ այն բոլորինս դարձնելու նպատակով»,- իր ելույթում ասաց Լուսինե Սահակյանը։
Ալավերդու համայնքապետ Սասուն Խեչումյանը նվեր և դիպլոմ հանձնեց Վահե Շահվերդյանին՝ Աբելյանի անվան թատրոնի 90-ամյակի և Լոռիում, մասնավորապես, Ալավերդիում թատերարվեստի գործում ունեցած անուրանալի վաստակի համար։
«Թատերական Լոռի» 29-րդ միջազգային փառատոնի զանգը հնչեցնելու պատիվը տրվեց ՀՀ ժողովրդական արտիստ Հակոբ Ազիզյանին։ Փառատոնի բացումը նշանավորվեց Հովհ․ Աբելյանի անվան թատրոնի «Անուշ»-ով։
