Քաղաքականություն
22.09.2021 | 12:35
ԱՄՆ պետքարտուղար Էնթոնի Բլինքենը նախօրեին ՄԱԿ-ի Գլխավոր վեհաժողովի շրջանակում հանդիպել է Թուրքիայի ԱԳ նախարար Մևլութ Չավուշօղուին, որի հետ քննարկել է Աֆղանստանում, ինչպես նաև Լեռնային Ղարաբաղում տիրող իրավիճակը։ Այս մասին Պետդեպարտամենտի բարձրաստիճան ներկայացուցիչն ասել է լրագրողների հետ հատուկ ճեպազրույցում, գրում է ՏԱՍՍ գործակալությունը։
«Թուրքիայի ԱԳ նախարար Չավուշօղլուի հետ հանդիպումը տևել է մոտ մեկ ժամ»,- ասել է Պետդեպի ներկայացուցիչը՝ նշելով, որ կողմերը քննարկել են իրավիճակը Աֆղանստանում, Սիրիայում, ինչպես նաև Լեռնային Ղարաբաղում։
«Նրանք համեմատաբար երկար զրույց են ունեցել Կովկասի մասին՝ Հայաստանի, Ադրբեջանի և Լեռնային Ղարաբաղի»,- ասել է ամերիկացի պաշտոնյան։
Նշենք, որ Թուրքիայի ԱԳ նախարար Մևլութ Չավուշօղլուն իր հերթին Թվիթերում Բլինքենի հետ հանդիպման վերաբերյալ գրառում է կատարել։
«Իմ գործընկերոջ՝ Էնթոնի Բլինքենի հետ քննարկեցինք վերջին զարգացումները Աֆղանստանում, Սիրիայում և Կովկասում։ Մենք կշարունակենք երկխոսությունը ԱՄՆ-ի հետ բոլոր մակարդակներում՝ տարածաշրջանային հարցերի ու համատեղ համագործակցության շուրջ»,- գրել է Չավուշօղլուն։
ԱՄՆ Պետքարտուղարության պաշտոնական կայքում տարածված հաղորդագրության համաձայն էլ՝ պետքարտուղար Բլինքենը Թուրքիայի ԱԳ նախարարի հետ քննարկել է ԱՄՆ-Թուրքիա համագործակցության տարբեր ոլորտներ։
«Թուրքիան ՆԱՏՕ-ի կարևոր դաշնակիցն է և քննարկումները ներառում էին համատեղ ջանքերը Աֆղանստանում ու տարածաշրջանային հուզող հարցերում»,- ասվում է հաղորդագրության մեջ։
Էմմա Չոբանյան
