Տնտեսություն
17.09.2021 | 18:05
Ռուսական հրաձգային զինատեսակներ արտադրող ORSIS ընկերության գլխավոր կոնսրուկտոր Մաքսիմ Բայմետովը Ռիա Նովոստիի հետ զրույցում այլ հարցերից զատ անդրադարձել է նաև ընկերության ու Հայաստանի համագործակցությանը։
Նա նշել է, որ հաջողվել է հաղթահարել Հայաստանի հետ առաջացած խնդիրները, որոնք կապված էին ՀՀ ՊՆ-ի կողմից չեղարկված մրցույթի հետ։
«Բանակ-2021» ցուցահանդեսի ընթացքում ընկերության ղեկավարությունը հանդիպել է Հայաստանի ռազմական գերատեսչության պատվիրակության հետ, որը ղեկավարում է պաշտպանության նոր նախարար Արշակ Կարապետյանը։ Մեր գործընկերները հետաքրքրություն են հայտնել ORSIS-ի զենքերի ամբողջ շարքի, այդ թվում՝ հեռանկարային մոդելների նկատմամբ։ Այսօր մի շարք նախապայմանագրային բանակցություններ են վարվում Երևանի հետ, և կարելի է ասել, որ ORSIS-ը բացել է նոր, դրական էջ հայկական կողմի հետ համագործակցության մեջ»,- ասել է Բայմետովը։
Նշենք, որ ռուսական ORSIS ընկերությունը 2019թ-ին հայտնվել էր Հայաստանին զենք մատակարարողների «սև ցուցակում» այն բանից հետո, երբ ՀՀ ՊՆ-ն չեղարկել էր մի քանի միլիոն դոլարի ռազմատեխնիկայի մատակարարման մրցույթը, որին մասնակցում էր ռուսական ընկերությունը: Այս գործով հարուցվել էր քրեական գործ Հայաստանի քրեական օրենսգրքի 376-րդ հոդվածով։
Բացի այդ, ընկերությունը նաև դատի էր տվել Հայաստանի ՊՆ-ին՝ զենքի մատակարարման մրցույթը առանց հիմնավորման չեղարկելու համար։
Էմմա Չոբանյան
