Ադրբեջանի տարածքում գործող ոստիկանական կետեր են, այստեղ չենք կարող որոշում ընդունել. Սուրեն Պապիկյան. ՏԵՍԱՆՅՈՒԹ

Այսօր Գյումրու «Շիրակ» օդանավակայանի սպասասրահի բացման պաշտոնական արարողությանը մասնակցող փոխվարչապետ Սուրեն Պապիկյանը, անդրադառնալով Գորիս-Կապան ավտոճանապարհին ստեղծված լարված իրավիճակին ու ադրբեջանցիների կողմից երկու իրանցի վարորդների ձերբակալմանը, ասաց, որ խնդրի լուծումը ՀՀ-ի դաշտում չէ։

Ըստ նրա, այս պահին բանակցություններ են ընթանում․ այս ուղղությամբ Իրանի Իսլամական Հանրապետության դիվանագիտական խողովակներն են աշխատում, և ամենայն հավանականությամբ, նրանց եռօրյա ժամկետում բաց կթողնեն։

Պատասխանելով այն հարցին էլ, թե հաշվի չէին առել, որ նման խնդիր կարող է առաջանալ, փոխվարչապետն ասաց, որ նման ռիսկեր չեն քննարկվել՝ հաշվի առնելով այն հանգամանքը, որ այս ուղղությամբ ռուս սահմանապահներն են աշխատում։

«Ադրբեջանի տարածքում գործող ոստիկանական կետերն Ադրբեջանի անելիքն են, մենք չենք կարող այստեղ որոշում ընդունել։ Ես չեմ կարող այսօր որոշել, որ չի լինելու, որովհետև Հայաստանի Հանրապետության և Ադրբեջանի Հանրապետության միջև այդ հատվածը նախնական ո՛չ դելիմիտացված է, ո՛չ դեմարկացված, բայց Խորհրդային Հայաստանի և Խորհրդային Ադրբեջանի միջև գոյություն ունեցող ճանապարհն արդեն իսկ ուվագծված է»,-ասաց փոխվարչապետը։

Փոխվարչապետը վստահեցրեց, որ բեռնափոխադրումների ցուցանիշն այս խնդրի հետևանքով չի նվազել։ «Երեք անշարժ և երկու շարժական ոստիկանական էկիպաժ ունենք, որ ուղեկցում են բեռնատարներին։ Անհրաժեշտության դեպքում այն բեռնատարները, որոնք կցանկանան երթևեկել Կապան-Տաթև ուղղությամբ, կարող են երթևեկել ոստիկանների ուղեկցությամբ։ Այնտեղ շինարարական աշխատանքներ են ընթանում և առանց ոստիկանների ուղեկցության խնդիրներ կարող են առաջանալ։

Շատերը խուսափում են դրանից, որովհետև մեքենաները գերբեռնված են և հաշվի են առնում այն, որ փոքր քարից անգամ անցանկալի դեպքեր կարող են տեղի ունենալ։ Բայց ունենք նաև այդ ուղղությամբ շարժվողներ,մասնավորապես միջին չափի մեքենաները Տաթև-Կապան ուղղությամբ կարողանում են երթևեկել։ Մեծ հաշվով ասֆալտապատումից հետո մենք կկարողանանք իրականացնել մեքենաների ազատ տեղաշարժն այս ուղղությամբ։

Միակ խնդիրը կարող է ծագել «Սատանի կամուրջ» կոչվող վայրում, սա Տաթևի հատվածում է, բայց այլընտրանք մենք արդեն սկսել ենք կառուցել Տաթև-Լծեն ճանապարհը»։

Փոխվարչապետն ասաց, որ մինչ տարեվերջ կունենանք այս ճանապարհի գրունտային տարբերակը։

Արմիկ Մովսիսյան