Հասարակություն
16.09.2021 | 13:45Զոհված զինծառայողների հարազատները կառավարության շենքի մոտ բողոքի ակցիա են իրականացնում՝ ընդդեմ սեպտեմբերի 21-ին կայանալիք «գունագեղ» միջոցառման։
«Պահանջում ենք մեզ ներկայացնել սեպտեմբերի 21-ին կայանալիք միջոցառման ծրագիրը»,- Factor.am-ի հետ զրույցում նշեց 44-օրյա պատերազմում զոհված Վահե Եղիկյանի հայրը:
«Թող նշեն Անկախության տոնը, չնայած ես չեմ համարում, որ այսօր անկախ ենք, անկախությունից մնացել է որոշ մասնիկ՝ մեր տղաների շնորհիվ, որոնք այսօր Եռաբլուրում են, զոհվել են հայրենիքի համար: Եթե նրանց հարգանքի տուրք պետք է մատուցեն տոնախմբությամբ, դա աբսուրդ է: Մենք պահանջում ենք, որ բավարարվեն միայն հայրենասիրական ու դասական երաժշտությամբ, քեֆ-ուրախություն, հռավառություն չլինի»:
Զոհված զինծառայողի հայրը նաև ընդգծեց, որ ավելի ճիշտ կլիներ, եթե տոնախմբության համար նախատեսված գումարներն ավելի նպատակային ծախսվեին. «Ճանաչում եմ շատ տղաների, որ ծառայել են իմ տղայի, նրա ընկերների հետ, մեկը վիրավոր է, մեկը հաշմանդամ է, թող այդ ֆինանսներն ուղղեին վերականգնողական կենտրոններին, այս տղաներին ուղարկեին արտասահման պրոթեզավորման»:
Մանրամասները՝ տեսանյութում:
