13.05.2026 | 23:30
Ադրբեջանը հիշատակվում է Պենտագոնի կողմից հրապարակված չբացահայտված թռչող օբյեկտների ֆայլերում
Մեկնարկել է «Երևան, իմ սեր» հիմնադրամի՝ զինհաշմանդամներին մասնագիտական նոր հմտություններ փոխանցելու ծրագրի երկրորդ փուլը
Հասարակություն
14.09.2021 | 12:43
«Երևան, իմ սեր» հիմնադրամը շարունակում է զինվորական ծառայության ընթացքում վիրավորված և հաշմանդամություն ձեռք բերած անձանց համար տարբեր ծրագրերի իրականացումը` նրանց նոր մասնագիտական հմտություններ փոխանցելու նպատակով:
Հանրապետության նախագահ, «Երևան, իմ սեր» հիմնադրամի հոգաբարձուների խորհրդի նախագահ Արմեն Սարգսյանի նախաձեռնած «Հայրենիքի պաշտպան» ծրագրի շրջանակում հիմնադրամը 2019 թվականից լուսանկարահանման, տեսանկարահանման և մոնտաժի դասընթացներ է իրականացնում զինհաշմանդամների համար: Դասընթացների առաջին փուլի մասնակից 8 զինծառայողներից Տիգրան Սարգսյանը ծրագրի ավարտից հետո որպես լուսանկարիչ աշխատանքի էր անցել հենց «Երևան, իմ սեր» հիմնադրամում:
Այս պահին ընթացքի մեջ է դասընթացների ծրագրի երկրորդ փուլը, որում ներգրավված են նաև 44-օրյա պատերազմի մասնակից 5 երիտասարդներ: Օգոստոսին մեկնարկած դասընթացը շարունակվելու է երեք ամիս և ամփոփվելու է մասնակիցների աշխատանքների ցուցահանդեսով։
Նախաձեռնելով «Հայրենիքի պաշտպան» ծրագիրը՝ Հանրապետության նախագահ Սարգսյանը կարևորել էր հայրենիքի համար կյանքն ու առողջությունը վտանգած երիտասարդներին նոր հմտությունների փոխանցումն ու նրանց համար աշխատանքային հնարավորությունների ստեղծումը՝ համարելով, որ աշխատանքը նրանց կյանքի բնականոն հուն վերադարձնելու լավագույն ճանապարհն է: Հիմնադրամի ծրագրերն ուղղված են հենց այդ նպատակին:
