14.09.2026 | 15:03
Իրանը կանչել է Ավստրիայի դեսպանին՝ Վիեննայում կայանալիք միջուկային համաժողովին իր պաշտոնյայի մասնակցությունը խոչընդոտելու համար
44-օրյա պատերազմին մասնակցած թուրք գեներալը կղեկավարի Բաքվում Թուրքիայի ԶՈւ հրամանատարական խումբը
Քաղաքականություն
10.09.2021 | 14:55
Բաքվում ստեղծվել է հատուկ հրամանատարական խումբ, որը ներկայացնում է թուրքական զինված ուժերն Ադրբեջանում: Ներկայացուցչության կազմի մեջ են մտել 4 թուրք գեներալ, հայտնում են ադրբեջանական ԶԼՄ-ները։
Խումբը կղեկավարի Թուրքիայի ցամաքային զորքերի օպերատիվ շտաբի պետ, գեներալ-մայոր Բախտիար էրսայը։
Թուրքական հրամանատարությունը կներկայացնեն նաև գեներալ Աբդուլլահ Գաթիրչին, գեներալ Էնդեր Գյուները, որը կգլխավորի հրամանատարական շտաբը և Թուրքիայի ռազմական կցորդ, գեներալ Զաքարիա Յալչինը:
Նկատենք, որ Բախտիար Էրսայի անունը շրջանառվում էր դեռևս 44-օրյա պատերազմի օրերին այն թուրք գեներալների շարքում, ովքեր մասնակցում էին ընդդեմ Լեռնային Ղարաբաղի պատերազմին։ Մասնավորապես ռուսական «Վզգլյադ» հրատարակչությունը, հղում կատարելով Ադրբեջանի ՊՆ-ում սեփական աղբյուրներին հայտնել էր, որ թուրք զինվորականները՝ Էրսայի հրամանատարությամբ, մասնակցել են ընդդեմ Լեռնային Ղարաբաղի ռազմական գործողություններին։
«Էրսայը գտնվում է Բաքվում։ Ադրբեջանի ԶՈւ գլխավոր շտաբի պետ Նաջմեդին Սադիգովի հեռացումից հետո Ղարաբաղի դեմ օպերացիայի հարցերով նա անձամբ է ղեկավարում գլխավոր շտաբը։ Նա օպերացիայի ընթացքի մասին հաշվետու է Թուրքիայի գերագույն ռազմաքաղաքական ղեկավարությանը», –այն ժամանակ գրել էր «Վզգլյադը»՝ հղում կատարելով Ադրբեջանի ՊՆ-ում սեփական անանուն աղբյուրին։
Տաթև Ֆռանգյան
