28.06.2026 | 13:32
Արման Եղոյանը և Արուսյակ Ջուլհակյանը ԱԺ փոխնախագահ դառնալու ցանկություն ունեն. առայժմ հայտնի է 4 թեկնածուի մասին
Հայկական ֆուտբոլի «սև շուկան»․ 3 հազարանոց տոմսեր՝ 40 հազարով
08.09.2021 | 17:24
Այսօր երեկոյան Հայաստանի ֆուտբոլի ազգային հավաքականն Աշխարհի 2022 թվականի առաջնության ընտրական փուլի շրջանակներում կընդունի Լիխտենշտեյնի հավաքականին։ Հանդիպումը կկայանա ժամը 20:00-ին՝ Վազգեն Սարգսյանի անվան «Հանրապետական» մարզադաշտում։ Դեռևս երկու օր առաջ պարզ դարձավ, որ խաղի՝ օնլայն վաճառվող տոմսերը սպառվել են։ ՀՖՖ-ի՝ տոմսերի առցանց ձեռքբերման համար նախատեսված tickets.ffa.am կայքում սեպտեմբերի 6-ի երեկոյան արդեն այսպիսի պատկեր էր։
ՀՖՖ մամուլի խոսնակ Հայկ Կարապետյանը Factor.am-ին հայտնեց, որ տոմսարկղերում վաճառվող տոմսերը սպառվել էին դեռևս սեպտեմբերի 5-ի դրությամբ։
Մարզական փորձագետները սա կապում են հավաքականի վերջին հաջողությունների հետ․ մեր թիմը, չնայած սեպտեմբերի 5-ին Գերմանիայի հավաքականից կրած 6-0 հաշվով ջախջախիչ պարտությանը, շարունակում է մնալ ընտրական խմբի 2-րդ տեղում և պահպանում է հաջորդ փուլ դուրս գալու շանսերը։ Հենց սրանով է պայմանավորված Հայաստան-Լիխտենշտեյն խաղի նկատմամբ ֆուտբոլասերների մեծ հետաքրքրությունն ու տոմսերի արագ սպառումը։ Չնայած առցանց տոմսերը հնարավոր էր ձեռք բերել միայն անձնագրի կամ նույնականացման քարտի պատճենը կցելու դեպքում, և մեկ անձը կարող էր ձեռք բերել առավելագույնը 5 տոմս, հանդիպման տոմսերը հայտնվել են սև շուկայում։
Առցանց հայտարարությունների կայքերում հանդիպման տոմսերը վաճառվում են հաճախ անտրամաբանական բարձր գներով։ Օրինակ՝ արևելյան տրիբունայի 3 հազար դրամանոց 1 տոմսն առաջարկվում է 40 հազար դրամով։
ՀՖՖ խոսնակը մեզ հայտնեց, որ այս ամենի վերահսկողությունն իրենց տիրույթում չէ, սակայն ասաց՝ պահպանել են նախապես հայտարարված գնման բոլոր պահանջները, այն է՝ փաստաթղթի առկայություն և մեկ անձին առավելագույնը 5 տոմսի վաճառք։
Չնայած դրան, փաստն այն է, որ ֆուտբոլասերներից շատերը զրկվել են Հայաստան-Լիխտենշտեյն խաղին մարզադաշտից հետևելու հնարավորությունից։
