23.08.2026 | 22:08
2 քննիչներին ծեծի ենթարկած ոստիկանը և ևս 1 մեղադրյալ կալանավորվել են․ ՔԿ
Ալեն Սիմոնյանը հանդիպել է Բելգիայի Ներկայացուցիչների պալատի և Սենատի նախագահների հետ
Քաղաքականություն
08.09.2021 | 17:04
Խորհրդարանների նախագահների 5-րդ համաշխարհային համաժողովի երկրորդ օրը` սեպտեմբերի 8-ին, ՀՀ Ազգային ժողովի նախագահ Ալեն Սիմոնյանը հանդիպել է Բելգիայի Ներկայացուցիչների պալատի նախագահ Էլիան Տիլյիոյին եւ Սենատի նախագահ Ստեֆանի Դ’Օզին:
«Հանդիպմանը մտքեր փոխանակվեցին երկու երկրների խորհրդարանների միջեւ առկա համագործակցային հարաբերությունների դինամիկ եւ շարունակական զարգացման շուրջ: Ալեն Սիմոնյանը հատկանշական համարեց 2020 թ. դեկտեմբերի 18-ին Բելգիայի Ներկայացուցիչների պալատի եւ դեկտեմբերի 11-ին Բելգիայի Սենատի կողմից «Լեռնային Ղարաբաղի հակամարտության վերջնական կարգավորմանն ուղղված Բելգիայի եւ միջազգային հաստատությունների նախաձեռնություններին սատարելու վերաբերյալ» բանաձեւի ընդունումը:
Այս համատեքստում ԱԺ նախագահը հատուկ շեշտեց նաեւ Բելգիայի Ներկայացուցիչների պալատի 2021 թ. մայիսի 27-ին «Ադրբեջանում գերության մեջ գտնվող հայ ռազմագերիների եւ քաղաքացիական անձանց վերադարձի վերաբերյալ` ի կատարումն 2020 թ. նոյեմբերի 9-ի հրադադարի մասին հայտարարության» բանաձեւի ընդունման կարեւորությունը:
Բելգիացի գործընկերները հատուկ շեշտեցին` Բելգիան շահագրգռված է, որ Հարավային Կովկասում հաստատվի տեւական խաղաղություն եւ պատրաստակամություն հայտնեցին աջակցելու Հայաստանին այն ապահովելու հարցում: Նրանք բարձր գնահատեցին հայ համայնքի դերը Բելգիայի հասարակության մեջ: Կողմերը փաստեցին, որ առկա բարեկամական հենքի վրա մտադիր են զարգացնել եւ խորացնել հայ-բելգիական միջխորհրդարանական եւ միջպետական հարաբերությունները` ի շահ երկու երկրների եւ ժողովուրդների»,- ասված էհաղորդագրությունում:
