Ձեզ մանդատ չեն տվել մեզ հավատալու-չհավատալու համար․ Վլադիմիր Վարդանյանը՝ ընդդիմադիր պատգամավորներին․ ՏԵՍԱՆՅՈՒԹ

«Սա ժողովրդի կողմից ձևավորված կառավարության ծրագիրն է, և այն ներկաացվել է ձեր դատին: Այս ծրագիրը կոչված է ապահովել ՀՀ և Արցախի համար անհրաժեշտ անվտանգային միջավայր»,- այս մասին ԱԺ-ում նշեց «Քաղաքացիական պայմանագիր» խմբակցության պատգամավոր Վլադիմիր Վարդանյանը:

Պատգամավորն անդրադարձավ խորհրդարանական կառավարման առանձնահատկություններին: «Դուք ասում եք՝ լավ բաներ եք գրել, բայց մենք ձեզ չենք հավատում: Ձեզ մանդատ չեն տվել մեզ հավատալու-չհավատալու համար: Դուք այստեղ եք, որպեսզի վերահսկողության գործառույթ իրականացնեք կառավարության ծրագրի իրականացման նկատմամբ»,- դիմելով ընդդիմադիր պատգամավորներին՝ նշեց  Վարդանյանը՝ հավելելով, որ ակնկալում էր կառավարության ծրագրի վերաբերյալ բովանդակային քննարկում:

Վարդանյանն իր ելույթում անդրադարձավ նաև խաղաղության հարցին։ «Հարցը, որն աստեղ անընդհատ շահարկվում է, խաղաղության օրակարգն է։ Ժողովուրդ, մի հատ հարցի պատասխանեք՝ մենք շարունակո՞ւմ ենք մնալ Միավորված ազգերի կազմակերպության անդամ, թե՞ ոչ։ Եթե շարունակում ենք, ուրեմն պետք է արձանագրենք, որ այնտեղ նախատեսված է հետևյալ պայմանը, որ յուրաքանչյուր պետություն, որը հանդիսանում է խաղաղասեր, կարող է դառնալ ՄԱԿ անդամ։ Մենք, այո, խաղաղության օրակարգով ենք գնում առաջ և մյուս պետություններին էլ պետք է պարտադրենք, որ խաղաղության օրակարգով գնանք առաջ։ Ասվածը որևէ եղանակով չի նշանակում, որ մեր պետությունը չպետք է ունենա անհրաժեշտ ինքնիշխան միջոցներով պաշտապանելու իր ինքնիշխան իրավունքները, իր բնակչությունը, իր տարածքը։ Դա չի նշանակում, որ մենք չպետք է ունենանք հզոր բանակ, դա չի նշանակում, որ մենք չպետք է պաշտպանենք մեր սահմանները, չպետք է պաշտպանենք մեր ազգային շահերը։ Բայց խաղաղությունը և խաղաղության օրակարգը դեռևս չի նշանակում պարտվողականության օրակարգ»,- ասաց պատգամավորը:

Մանրամասները՝ տեսանյութում: