14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Չգիտեմ՝ իմ գյուղից 12 կմ հեռու ինչ ա կատարվում․ Շուռնուխի գյուղապետ
Հասարակություն
26.08.2021 | 11:17
Ինչպես արդեն տեղեկացրել էինք, երեկ ժամը 23:00-ի սահմաններում ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: Շուռնուխի գյուղապետ Հակոբ Արշակյանի խոսքով՝ թեև բնակիչների մոտ անհանգստություն կա, բայց գյուղում իրավիճակը համեմատաբար հանգիստ է․
«Ադրբեջանցիների էդ կուտակումները հա էլ կան, միշտ էլ դրանց մեքենաները գնացել-եկել են։ Երեկ մի պահ մերոնք փակեցին էդ ճանապարհը, որոշ ժամանակ անց՝ բացեցին, դրանից հետո տրանսպորտային միջոցները լրիվ տարհանվեցին ու էլ տեղեկություններ չունենք։ Էս պահին ո՛չ Կապան, ո՛չ Գորիս մեքենա չի գնում»,- Factor.am-ի հետ զրույցում ասաց համայնքապետը։
Հարցին, թե խոսքը ադրբեջանական քանի զինծառայողի մասին է, Արշակյանը դժվարացավ պատասխանել․ «Ես չգիտեմ՝ իմ գյուղից 12 կմ հեռու ինչ ա կատարվում։ Երևի ռուսի հետ մի բան անեմ, մոտենամ էդ հատվածին, հասկանամ՝ ինչն ինչոց ա։ Վախ կա, միայնակ մեքենայով մոտենալու»։
Հիշեցնենք՝ Թաթոյանը գիշերը ֆեյսբուքյան իր էջում գրել էր, որ ադրբեջանական 50 կամ ավելի զինված ծառայողներ փակել ու հրաժարվում են բացել Կապան-Գորիս միջպետական ճանապարհի Կարմրաքար-Շուռնուխ ճանապարհը։ Պաշտպանն այս արարքները հանցավոր է որակում՝ նշելով՝ սահմանափակվել է մարդկանց, ողջ քաղաքացիական բնակչության, այդ թվում՝ երեխաների, կանանց, տարեցների, ազատ տեղաշարժը․
«Փաստերից ինձ համար ակնհայտ է, որ սա նախապես պլանավորված բացահայտ հանցագործություն է Հայաստանի քաղաքացիական բնակչության դեմ: Տեղյակ եմ, որ ՌԴ սահմանապահ ծառայողները, ՀՀ սահմանապահները նույնպես տեղում վարել են ճանապարհը բացելու բանակցություններ, և քաղաքացիկան մեքենաները դուրս են բերվել: Ըստ ստուգված տվյալների՝ բանակցությունները առավոտ են շարունակվելու. հրաժարվել են բացել»,- գրել է Թաթոյանը, հավելելով, որ միջադեպի մասով հաղորդումներ կուղարկի միջազգային մարմիններին։
Առավոտյան հայտարարություն տարածեց նաև Ազգային անվտանգության ծառայությունը, նշելով, որ այս պահին աշխատանքներ են իրականացվում ճանապարհը բացելու, մարդկանց և տրանսպորտային միջոցների տեղաշարժի բնականոն աշխատանքը վերականգնելու ուղղությամբ։
Ռոզա Վարդանյան
