Քաղաքականություն
18.08.2021 | 22:37
Առնվազն երկու ամերիկացի պաշտոնյաներ, որոնք եղել են Գերմանիայում, դիմել են բժշկական օգնության՝ Հավանայի համախտանիշ կոչվող առեղծվածային հիվանդության ախտանիշների հայտնվելուց հետո, հայտնում են ամերիկացի դիվանագետները, գրում է The Wall Street Journal-ը:
Ախտանիշները, որոնք ներառում են սրտխառնոց, ուժեղ գլխացավեր, ականջի ցավ, հոգնածություն, անքնություն և դանդաղկոտություն, սկսել են ի հայտ գալ վերջին ամիսներին։ Դիվանագետների խոսքով՝ ախտանշաններ ունեցող որոշ պաշտոնյաներ անգործունակ են: Սա առաջին դեպքն է, որը գրանցվել է ՆԱՏՕ-ի անդամ այս երկրում, որտեղ տեղակայված են ամերիկյան զորքերը և միջուկային զենք:
Ամերիկացի դիվանագետները հայտնել են, որ նման միջադեպեր են գրանցվել եվրոպական այլ երկրներում տեղակայված ամերիկյան դիվանագիտությունում աշխատող այլ պաշտոնյաների շրջանում ևս, սակայն հրաժարվել են որևէ մանրամասներ ներկայացնել:
Ըստ ամերիկացի դիվանագետների և հիվանդության հետաքննությանը ծանոթ մարդկանց՝ տուժողների մի մասը եղել են հետախուզության աշխատակիցներ կամ դիվանագետներ, որոնք աշխատում են Ռուսաստանի հետ կապված հարցերում, ինչպիսիք են գազի արտահանումը, կիբերանվտանգությունը և այլ:
Այս ախտանշաններն առաջին անգամ հայտնաբերվել են 2016-ին Կուբայում ամերիկացի դիվանագետների շրջանում և այդ ժամանակվանից ի վեր դրանք նկատվել են Չինաստանում, Ռուսաստանում և վերջերս՝ Ավստրիայում, չեզոք երկրում: Եղել են չհաստատված դեպքեր Լեհաստանում, Թայվանում, Վրաստանում և նույնիսկ Վաշինգտոնում: ԱՄՆ որոշ պաշտոնյաներ ասել են, որ բողոքները կարող են առաջանալ ռադիոհաճախականությունների էներգիայի օգտագործմամբ հարձակումների պատճառով, ինչպիսին է միկրոալիքային ճառագայթումը:
Տաթև Ֆռանգյան
