Քաղաքականություն
12.08.2021 | 13:24Այս իշխանության տարիներին Հայաստանում թոշակներն ավելացել են շուրջ 3000 դրամով, իշխանության քաղաքական թիմի անդամները ստացել են 120 մլն դոլարի պարգևավճարներ։ Այս մասին այսօր ԱԺ–ում հայտարարեց «Հայաստան» խմբակցության անդամ Արեգնազ Մանուկյանը:
«Ե՞րբ եք դադարեցնելու ինքնապարգևատրումների այս մեխանիզմը, և ե՞րբ են մեր կենսաթոշակառուների թոշակները դառնալու արժանապատիվ»,- Արեգնազ Մանուկյանն այս հարցն ուղղեց «Քաղաքացիական պայմանագրի կողմից ԱԺ աշխատանքի և սոցիալական հարցերի և առողջապահության հարցերի մշտական հանձնաժողովի նախագահի պաշտոնում առաջադրված Հերիքնազ Տիգրանյանին՝ հավելելով՝ թոշակառուները դեմ չէին լինի կենսաթոշակները ստանալ կանխիկ, որքան դուք պարգևավճարներ եք բաժանել:
Տիգրանյանը պատասխանեց, որ թոշակների նման բարձրացման չափը դեռ շատ հեռու է ոչ միայն իշխանական թիմի առջև դրված գերնպատակից, այլև բավարար ու արժանապատիվ գոյություն ապահովելու չափից։ Տիգրանյանը նաև հայտնեց, որ իշխանության ծրագրով մինչև 2025թ.-ը թոշակները պետք է ավելանան շուրջ 40 000 դրամի չափով։
Ինչ վերաբերում է պարգևավճարներին, Տիգրանյանը նշեց, որ 2020թ. փետրվարից ի վեր պատգամավորները որևէ պարգևավճար չեն ստացել։ Իսկ գործադիր իշխանությունում, նրա խոսքով՝ պարգևատրումները եղել են, կան և կլինեն:
Մանրամասները՝ տեսանյութում:
