Քաղաքականություն
09.08.2021 | 15:38«Այսպիսի անվտանգային միջոցառումներ երբևէ Ազգային ժողովում չեն իրականացվել: Ի՞նչ եք պատրաստվում ստորագրել, որ ուզում եք կանխել ժողովրդի հնարավոր ցասումը, ժողովրդի մուտքը ԱԺ »,-«Քաղաքացիական պայմանագիր» խմբակցության կողմից ԱԺ պաշտպանության և անվտանգության հարցերի մշտական հանձնաժողովի նախագահի պաշտոնում Անդրանիկ Քոչարյանի թեկնածության հարցի քննարկման ժամանակ Քոչարյանին այս հարցն ուղղեց «Հայաստան» դաշինքի պատգամավոր Ագնեսա Խամոյանը:
«Տիկի՛ն Խամոյան, ժողովրդի ցասում որտե՞ղ եք տեսել։ Բաղրամյան փողոցում այս ցասումն այդպես էլ ավարտական ուղեկից չունեցավ, խնդիրը դրա մեջ չէ»,- պատասխանեց Անդրանիկ Քոչարյանը։
Նա հիշեցրեց, թե ինչ կատարվեց նոյեմբերի տասին, երբ քաղաքացիների խմբերը ներխուժեցին ԱԺ. «Այդ խմբերը մի օր կային, բայց ցասում իրականացնող ժողովուրդ չկար»:
Քոչարյանն ընդգծեց, որ պետական պահպանության ծառայությունն է, ելնելով ինչ-ինչ տեղեկատվությունից, որոշում կայացրել և իրականացնում անվտանգության միջոցառումը:
Խամոյանը կրկնեց հարցը, թե ինչ կապ կա հնարավոր ստորագրվելիք փաստաթղթի և ԱԺ-ում աննախադեպ ուժեղացված վերահսկողության ծառայության միջև․ «Ընդ որում, Արարատ Միրզոյանի հետ կապված դեպքը նոյեմբերին եղավ, մինչդեռ դրանից հետո անվտանգային այսպիսի միջոցառումներ չձեռնարկվեցին»։
Անդրանիկ Քոչարյանը պատասխանեց, որ ոչ մի կապ չկա․ «Որևէ մեկը որեւէ բան ձեր թիկունքում չի ստորագրելու, և, առհասարակ, ԱԺ թիկունքում չի ստորագրելու»։
Մանրամասները՝ տեսանյութում:
