Ջերմոցային գազերի շարունակական արտանետումները կարող են մեկ տասնամյակում խախտել ջերմաստիճանի առանցքային սահմանը․ ՄԱԿ-ը զեկույց է հրապարակել

Մարդկության վնասակար ազդեցությունը կլիմայի վրա փաստ է, ասված է ՄԱԿ-ի գիտնականների այս ուղենշային հետազոտության մեջ, գրում է BBC-ն:

Զեկույցում ասվում է, որ գազերի շարունակական արտանետումները կարող են նաև մեկ տասնամյակում խախտել ջերմաստիճանի առանցքային սահմանը:

Հեղինակները նաև ցույց են տալիս, որ այս դարավերջին ծովի մակարդակի բարձրացումը, որը մոտենում է 2 մետրի, «չի կարելի բացառել»:

Սակայն հույս կա, որ ջերմոցային գազերի արտանետումների խոր կրճատումները կարող են կայունացնել ջերմաստիճանի բարձրացումը:

Կլիմայի փոփոխության միջկառավարական խորհրդի (IPCC) այս սթափ գնահատականը ներկայացված է 42 էջանոց փաստաթղթում, որը հայտնի է որպես «Ամփոփագիր քաղաքականություն մշակողների համար»:

Դրան կհաջորդեն մի շարք զեկույցներ, որոնք կհրապարակվեն առաջիկա ամիսների ընթացքում և կդառնան կլիմայի փոփոխության վերաբերյալ առաջին խոշոր գիտական ակնարկը 2013 թվականից ի վեր: Այն հրապարակվել է Գլազգոյում կայանալիք կլիմայի փոփոխությունների վերաբերյալ առանցքային գագաթնաժողովից երեք ամիս առաջ, որը հայտնի է որպես COP26:

«Այսօրվա «IPCC աշխատանքային խմբի զեկույց 1-ը» կարմիր ծածկագիր է մարդկության համար»,- ասել է ՄԱԿ-ի գլխավոր քարտուղար Անտոնիո Գուտերեշը:

«Եթե մենք հիմա միավորենք ուժերը, մենք կարող ենք կանխել կլիմայական աղետը: Բայց, ինչպես պարզ է դառնում այսօրվա զեկույցից, մենք ո՛չ հապաղելու ժամանակ ունենք, ո՛չ էլ արդարացումների տեղ: Հույսս դնում եմ պետությունների ղեկավարների և շահագրգիռ բոլոր կողմերի վրա` COP26- ի հաջողությունը ապահովելու համար »,- ասել է Գուտերեշը:

Տաթև Ֆռանգյան