Իրաքը դադարեցնում է դեպի Բելառուս բոլոր ուղևորատար ավիաչվերթները

Իրաքն անորոշ ժամանակով դադարեցնում է դեպի Բելառուս բոլոր ուղևորատար ավիաչվերթները: Iz․ru-ի փոխանցմամբ՝ այս մասին օգոստոսի 7-ին Facebook-ի իր էջում հայտնել է Իրաքի քաղաքացիական ավիացիայի վարչությունը։

Ընդ որում, դա չի վերաբերում Բելառուսից Իրաք չվերթներին. դրանք կշարունակվեն: «Իրաքյան ավիաուղիներ» ավիաընկերությունը հստակեցրել է, որ մեկ շաբաթով դադարեցնում է դեպի Մինսկ թռիչքները:

Որոշումը հայտարարվել է Իրաքից անօրինական ներգաղթյալների թվի աճի ֆոնին, որոնք փորձում են բելառուսական սահմանով հասնել Լիտվա:

Ինչպես նույն օրը Twitter-ի իր էջում գրել է Եվրամիության դիվանագիտության ղեկավար Ժոզեպ Բորելը, նա ողջունում է Իրաքից Բելառուս ավիաչվերթների դադարեցումը:

ԵՄ-ի և Իրաքի շահերից է բխում միգրանտներին քաղաքականության գործիքներ դարձնելու կանխարգելումը և մարդկանց պաշտպանությունը քրեական կառույցների կողմից չարաշահումներից, եզրափակել է եվրոպական դիվանագիտության ղեկավարը:

Ավելի վաղ այդ օրը Լիտվայի իշխանությունները հայտարարել էին անօրինական միգրանտներին 300-ական եվրո վճարելու պատրաստակամության մասին, եթե նրանք համաձայնեն լքել երկիրը և վերադառնալ հայրենիք:

Հուլիսին Լիտվան հայտարարել էր երկրում միգրացիոն ճգնաժամի մասին և մեղադրել Բելառուսին դրա համար պայմաններ ստեղծելու մեջ: Հանրապետության նախագահ Գիտանաս Նաուսեդայի խոսքով ՝ երկիրը Եվրամիության համակողմանի օգնության կարիք ունի, իսկ այն, ինչ տեղի է ունենում Լիտվա-Բելառուս սահմանին, «հիբրիդային հարձակում է Լիտվայի վրա, որը ֆինանսավորում է բելառուսական ռեժիմը»:

Միգրացիոն գործընթացները զսպելու համար հուլիսի 9-ին Լիտվայում սկսվել է Բելառուսի հետ սահմանին պատի տեղադրումը։