Ադրբեջանի հավելյալ պահանջներից մեկը միջանցքն է. Էդուարդ Աղաջանյան. ՏԵՍԱՆՅՈՒԹ

Մեր երկրի համար շարունակում է առաջնային մնալ սահմանների անվտանգության խնդիրը: Այսօր էլ Ադրբեջանը կրակ է բացել Երասխի ուղղությամբ: Ինչ հանգուցալուծում է ակնկալվում, ինչու գործը առաջ չի գնում: Թեմայի շուրջ Factor TV-ի հետ զրույցում «Քաղաքացիական պայմանագիր խմբակցության պատգամավոր Էդուարդ Աղաջանյանը նշեց, որ այդ հարցը քաղաքական բոլոր ուժերի և հանրության ուշադրության կենտրոնում է, գործընթացները կարող են զարգանալ ցանկացած սցենարով:

Աղաջանյանը հղում կատարեց Նիկոլ Փաշինյանի՝ ՊՆ-ում ունեցած ելույթին՝ նշելով, որ վարչապետն արձանագրել է՝ սահմանային իրավիճակը բավակնին լարված է, և առաջ է քաշել այն թեզերն ու պատկերացումները, որոնք տեղավորվում են ՀՀ օրակարգում: «Մեզ համար առաջնային է նոյեմբերի 9-ի և դեկտեմբերի 11-ի եռակողմ հայտարարությունների իրագործումը՝ առանց նախապայմանների:

Այդ ելույթում ամենակարևոր թեզն այն էր, որ քանի դեռ չենք սպառել դիվանագիտական ճանապարհով այս խնդիրը լուծելու հնարավորությունները, խուսափելու ենք ռազմական էսկալացիայից»,- նշեց պատգամավորը:

Հարցին, թե ինչն է խնդիրը, որ տարածաշրջանում խաղաղություն չի հաստատվում, Ադրբեջանն ինչ պահանջներ է ներկայացնում, որոնք ընդունելի չեն Հայաստանի համար, Աղաջանյանը պատասխանեց, որ շոշափվում է միջանցքի գաղափարը, որը ո՛չ գրավոր, ո՛չ բանավոր տեսքով ՀՀ-ի հետ չի համաձայնեցվել: «Այս թեման մեզ համար փակ է, ՀՀ սուվերեն տարածքով միջանցքի մասին քննարկման հարց չկա: Թե ինչ ակնկալիքներ և հավելյալ պահանջներ ունի Ադրբեջանը, թերևս, դրանցից մեկը հենց միջանցքն է: Ադրբեջանում ամենաբարձր մակարդակով այս մասին խոսվում է»,- նշեց Աղաջանյանը՝ հավելելով, որ Բաքվի և Երևանի միջև այդ հարցի վերաբերյալ ուղիղ քննարկումներ չկան:

Մանրամասները՝ տեսանյութում: