Ռուբինյանը հակադարձեց Ղազինյանին՝ հիշեցնելով Պողոս Պողոսյանի սպանությունը. ՏԵՍԱՆՅՈՒԹ

«Հայաստան» խմբակցության պատգամավոր Արթուր Ղազինյանն ԱԺ նիստում անդրադառնալով «Պատիվ ունեմ» խմբակցության պատգամավոր Աննա Մկրտչյանի ելույթի ժամանակ ԱԺ նախագահության և իշխող խմբակցության արձագանքին, այն նկարագրեց այսպես. «Հինգ արական սեռի ներկայացուցիչ բարձր ձայներով հարձակվել էին մի աղջկա վրա, ով համարձակվել էր անուն ասել»:

«Բոլորս պետք է բացառիկ ընդգծված հարգանք ցուցաբերենք կանաց նկատմամբ: Կոռե՛կտ եղեք կնոջ նկատմամբ»,- հորդորեց ընդդիմադիր պատգամավորը:

Նա նաև կարծիք հայտնեց, որ իրավական տեսանկյունից ԱԺ նախագահի կիրառած տույժը իրավաչափ չէր և համարժեք չէր տեղի ունեցածին:

«Ես չէի մտածում, որ այդ անունը կարող է որպես վիրավորանք դիտվել,- նշեց Ղազինյանը: Հիշեցնենք՝ Աննա Մկրտչյանն իր ելույթում ասել էր. «Նիկոլը ռիսկ չի արել գնալ Արցախ», «կապիտուլյանտ Նիկոլ»:

«Եկեք անունների արտասանության հետ կապված՝ մարդկանց վրա չհարձակվենք և չփորձենք լռեցնել»,- կոչ արեց Ղազինյանը:

ԱԺ փոխնախագահ Ռուբեն Ռուբինյանը հակադարձեց՝ ասելով, որ տիկին Մկրտչյանի վրա որևէ մեկը չի հարձակվել: «Հնչեցվել են ոչ միայն անուն, այլև մի շարք վիրավորական արտահայտություններ, և ԱԺ նախագահության պարտականությունն է՝ պաշտպանել ցանկացած պատգամավորի վիրավորանքներից։ Եվ, պարոն Ղազինյան, տարօրինակ է, որ դուք եք խոսում անուններից, որովհետև «Պապլավոկում» կարծեմ ձեր դաշինքի առաջնորդի և ձեր դաշինքի մաս կազմող ուժերից մեկի անդամի մասնակցությամբ միջադեպ էր եղել, որն ավարտվել էր այդ անդամի մահով»:

Մանրամասները՝ տեսանյութում: